Шуъбаи тафтишотии шаҳри Заполярнийи Раёсати Кумитаи тафтишотии Федератсияи Русия дар вилояти Мурманск тафтиши парвандаи ҷиноиро нисбат ба як сокини 57-солаи шаҳраки Никел ба анҷом расонд. Ӯ барои одамрабоӣ нисбат ба ду ё зиёда аз ин бо маслиҳати пешакӣ ва истифодаи меҳнати ғуломона муттаҳам мешавад.
Тибқи маълумоти тафтишот, айбдоршаванда дар солҳои 2012–2025 бо як шиноси худ се нафарро бе бастани шартномаи меҳнатӣ маҷбур мекарданд, ки дар пойгоҳи ҷамъоварии оҳанпора кор кунанд.
Дар сурати сарпечӣ аз иҷрои корҳо, ҷабрдидагон мавриди латукӯб қарор гирифта, дар таҳхона маҳкам карда мешуданд ва ҳамчунин маҷбур мешуданд, ки санадҳои қарздориро имзо намоянд. Ҳангоми кӯшиши фирор онҳо пайдо карда шуда, бо истифода аз зӯроварӣ дубора ба ҷои кор баргардонида мешуданд.
Ҷиноят дар натиҷаи ҳамкории муфаттишони Кумитаи тафтишот бо кормандони ҷустуҷӯи ҷиноятии шуъбаи корҳои дохилии ноҳияи Печенга ва Раёсати ҷустуҷӯи ҷиноятии вилояти Мурманск ошкор гардидааст.
Муфаттишон далелҳои кофиро ҷамъоварӣ намудаанд ва бинобар ин парвандаи ҷиноӣ бо хулосаи тасдиқшудаи айбдоркунӣ барои баррасӣ аз рӯйи моҳият ба суд ирсол шудааст.
