Ираклий Узнадзе, ҷудокори гурҷӣ сармураббии нави тими миллии ҷудои Тоҷикистон таъин шуд. Ӯ дар ин мақом Муҳаммадмурод Абдураҳмоновро, ки аз соли 2018 сармураббии дастаи мунтахаби ҷудои кишварро ба уҳда дошт, иваз кард.
Ба иттилои ТВ «Варзиш», Ираклий Узнадзе яке аз мураббиёни шинохтаи ҷудои ҷаҳон буда, дар фаъолияти касбии худ роҳбарии тимҳои миллии Гурҷистон ва Туркияро ба уҳда доштааст. Зери роҳбарии ӯ варзишгарон дар Бозиҳои олимпӣ, чемпионатҳои ҷаҳон ва Аврупо, инчунин мусобиқаҳои Grand Slam, Grand Prix ва Masters соҳиби даҳҳо медал гардидаанд.
Ӯ ду маротиба аз ҷониби Иттиҳоди Аврупоии Ҷудо (EJU) беҳтарин мураббии ҷудои Аврупо эътироф шуда, ҳамчунин соҳиби унвони беҳтарин мураббии Гурҷистон мебошад.
Ҷалби чунин мутахассиси пуртаҷриба боз як қадами муҳим дар самти рушди ҷудои тоҷик ба ҳисоб меравад. Ҳадафи асосӣ омода намудани ҷудокорони рақобатпазир, тақвияти ҳайати мунтахаб ва фароҳам овардани замина барои ба даст овардани натиҷаҳои арзанда дар мусобиқаҳои бонуфузи байналмилалӣ мебошад.
Акс аз манбаъҳои боз
