Ширкати расонаии Чин (China Media Group, CMG) тасмими худро дар бораи боздоштани пахши бозиҳои чемпионати Испания оид ба футбол дар пайи моҷарои марбут ба ҳамлагари фаронсавии «Реал Мадрид» Килиан Мбаппе тасдиқ кард. Дар ин бора сомонаи sport.es хабар додааст.
26 октябр дар шабакаҳои иҷтимоӣ наворе паҳн шуд, ки дар он аз Мбаппе дар бораи меми дӯстдоштааш бо иштироки худаш мепурсанд. Футболбоз гуфтааст, ки «тасвире, ки дар он чеҳраи ӯро ба ҷойи чеҳраи диктатори чинӣ гузоштаанд, ӯро бисёр механдонад». Ӯ Мао Тсэдунро дар назар дошт. Дар Чин шӯхӣ кардан дар бораи ин шахс беэҳтиромӣ ба ҳисоб меравад.
Дар пайи ин ҳодиса ширкатҳои чинии Dongpeng Beverage ва Mengniu шартномаҳои таблиғотии худро бо Мбаппеи 27-сола қатъ карданд. Ҳамчунин, Телевизиони марказии Чин (CCTV) тамоми маводи марбут ба футболбозро аз барномаҳои хабарии худ ҳазф кард.
Мбаппе дар изҳороте гуфт, ки суханони ӯро нодуруст фаҳмидаанд. Ӯ ҳамчунин аз ҳамаи онҳое, ки аз гуфтаҳояш ранҷидаанд, узр хост.
Сухангӯи Вазорати корҳои хориҷии Чин Го Ҷякун изҳор дошт, ки кишвараш узрхоҳии футболбозро «қадр мекунад». Аммо дар Ширкати CMG таъкид карданд, ки суханони Мбаппе «аз доираи озодии баён берун рафта, мардуми Чинро таҳқир кардаанд».
Намояндагони ширкат ҳамчунин изҳор доштанд, ки аз бошгоҳи «Реал Мадрид» низ узрхоҳӣ интизоранд.
