Сиёвуш Кенҷаеви 18-сола дар Донишгоҳи Шанхай таҳсил мекунад. Дар баробари таҳсил, ӯ ба тиҷорат машғул аст. Тоҷирон аз Тоҷикистон ба ӯ молҳои гуногунро фармоиш медиҳанд ва ӯ аз ин кишвар гирдоварӣ ва ба Тоҷикистон ирсол мекунад.
Ӯ аз замони мактабхонӣ мехост дар Чин маълумоти олӣ бигирад. Бинобар ин, ба омӯзиши забони чинӣ пардохт. Ҳоло бо бурсияи махсус 4 сол ройгон таҳсил мекунад ва ҳар моҳ 2,5 ҳазор юан идрор мегирад.
«Талабот ба бурсияи ман душвор набуд, яъне, дар сатҳи дараҷаи 4 донистани чинӣ. Хушбахтона, дар ду соли забономӯзӣ тавонистам то дараҷаи панҷум расам.»,- нақл кард ӯ.
Сиёвуш мисли аксари донишҷӯёни хориҷӣ дар Чин як сол ба забономӯзӣ ҷалб нашуд, балки дарсҳои ососии донишгоҳро бо забони чинӣ меомӯзад.
Ба Сиёвуш соҳибкорони тоҷикистонӣ молу маҳсулот фармоиш медиҳанд ва ӯ аз Чин барояшон мефиристад. Молҳоро суғурта ва сипас ирсол мекунад. Зеро, дар ҳолати гум шудани мол, ширкати суғуртавӣ онро барқарор менамояд.
«Кори мо осон нест, вале онро дӯст медорам. Чун ҳоло дар риштаи тиҷорат таҳсил мекунам, фаъолият кардану таҷриба гирифтанхуб аст. Албатта, ин бароям манбаъи даромади иловагист.»,- нақл намуд ҳамсуҳбати мо.
Ӯ ҳоло аз тариқи Инстаграм тиҷораташро рушд доданист ва аз имконоти ин шабака истифода мебарад.
Пас аз хатми донишгоҳ мехоҳад дар Тоҷикистон ширкати боррасонӣ таъсис диҳад.
Ҳафизуллоҳ Тоҳирӣ
