Меҳмони нашри 30-юми барномаи “Бол” Муҳаммадҷон Шарифзода буда, соли дуюм аст, ки дар риштаи тибби Донишгоҳи байналмилалии Қибриси Шимолӣ (CIU) таҳсил менамояд.
Муҳаммадҷон аз замони мактабӣ мехост табиб шавад ва аз расонаҳо дар бораи Cyprus International university маълумот пайдо карда ба ин донишгоҳ ҳуҷҷат супурд. Баҳоҳои аъло дар гувоҳномаи хатм ӯро соҳиби бурсияи 4-солаи таҳсили ройгон дар Қибриси (Кипри) Шимолӣ гардонд.
“Ният дорам пас аз чор соли таҳсил дар ин донишгоҳ, барои ба даст овардани ихтисос дар яке аз давлатҳои Аврупо се соли дигар таҳсил намоям.”,-гуфт ӯ.
Ба нақли Муҳаммад, донишҷӯён дар Қибрис танҳо бо донистани забони туркӣ кори мувофиқ пайдо мекунанд. Аммо ҳамсуҳбати мо тоза ба омӯзиши забони туркӣ пардохтааст ва барои таъмини рӯзгораш корҳои фосилавиро аз тариқи интернет анҷом медиҳад.
“Дар баробари кору ихтисоси асосӣ, ният дорам ягон касби муосирро онлайн анҷом диҳам то даромади иловагӣ дошта бошам.”,- илова кард меҳмони барнома.
Муҳаммадҷон ният дорад пас аз соҳибихтисос гардидан ба Ватан баргардад. Зеро, ҳадафи таҳсил дар хориҷ ин будааст, ки ба мардум бо сатҳу сифати беҳтар хидмат намояд.
Ҳафизуллоҳ Тоҳирӣ
