Ин ҳафта дар барномаи «Бол» бо Мадина Муродова суҳбат доштем. Ӯ ҳоло дар риштаи иқтисоди яке аз донишгоҳҳои Чин таҳсил мекунад.
Ӯ ҳанӯз аз шашсолагӣ бо забони чинӣ ошноӣ дошт, вале ба омӯзиш пас аз 14-солагӣ оғоз намуд. Мақсад аз омӯзиши забони чинӣ он буд, ки мехост маълумоти олиро дар Чин бигирад. Моҳи декабри соли 2019 ба яке аз донишгоҳҳои Чин ҳуҷҷат супурда, моҳи январи соли 2020 ҷавоби мусбат гирифт. Яъне, донишҷӯ гардид. Бинобар сабаби бемории ҳамагири “COVID-19” дарсҳо «онлайн» ба роҳ монда шуданд. Давоми як сол фосилавӣ таҳсил кард, аммо холи лозимиро ба даст оварда натавонист ва ба курси дигар роҳ наёфт.
“Вақте фаҳмидам, ки дарсҳои Чин фосилавӣ ба роҳ монда мешавад, ҳамон сол аз тариқи Маркази миллии тестӣ ба Донишгоҳи миллии Тоҷикистон ҳуҷҷат супорида, донишҷӯ шудам. Яъне, соли 2020 дар Тоҷикистон ва Чин таҳсил мекардам. Ду сол дар ватанамон таҳсил намуда ва соли 2022 боз ба донишгоҳи Чин ҳуҷҷат супоридам. Вақте ба донишгоҳи ин кишвар қабул шудам, таҳсилро дар Донишгоҳи миллии Тоҷикистон мавқуф гузоштам ва ҳоло дар риштаи иқтисоди яке аз донишгоҳҳои Чин таҳсил мекунам.”, — гуфт ҳамсуҳбати мо.
Мадина ният дорад тобистон модарашро ба Чин бубарад, зеро, модари ӯ дар Душанбе танҳост.
Мадина пас аз хатми донишгоҳ ба Ватан баргашта, аз рӯйи тахассуси гирифта фаъолият карданист. Инчунин мехоҳад таҳсили нотамомро дар ДМТ ба поён расонад. Мо низ дар ин ҷода барояш муваффақият мехоҳем.
Ҳафизуллоҳ ТОҲИРӢ
