Ҳайдар Искандарзода магистранти Kyongpook National University-и Кореяи Ҷанубӣ буда, зеҳни сунъиро меомӯзад.
Дар барномаи «Бол» ба мо бобати таҳсилу зиндагӣ дар хориҷи кишвар суҳбат кардем.
Ҳайдар соли 2020 Донишгоҳи технологии Тоҷикистонро бо ихтисоси муҳандис-барномасоз хатм намуд ва ҳамон сол ҳуҷҷатҳояшро барои зинаи магистратура ба Кореяи Ҷанубӣ супурд.
“Бархе вақте ба донишгоҳи Корея роҳ меёбанд, хурсанд мегарданд, вале ман андӯҳгин будам. Зеро, дар вазъияти вазнин барои аҳли башар — авҷи пандемияи коронавирус ба Кореяи Ҷанубӣ сафар мекунам. Хушбахтона, бо хатсайри чартерӣ имкон пайдо кардем, ки ба ин кишвар расем.«, — ба ёд овард ӯ.
Ҳайдар баъди як соли забономӯзӣ, ду сол зинаи магистратураро ройгон мегузарад. Ҳар моҳ 800 доллар ба идрор дода мешавад.
Ҳамсуҳбати мо мегӯяд, зеҳни сунъӣ дар соҳаҳои гуногун истифода мешавад. Ӯ дар соҳаи тандурустӣ мехоҳад онро истифода кунад. Ҳоло лоиҳаеро амалӣ карданист, ки барои дақиқтару сареътар муайян кардани бемории саратон бояд кумак кунад.
Ба нақли Ҳайдар, агар лоиҳа дар ин нимсола анҷом ёбад, як нимсолаи дигар таҳсилашро аз ҷайби худ тамдид мекунад.
Ҳайдар нақша дорад, ки пас аз хатми зинаи магистратура 2-3 сол аз рӯи ихтисос дар Кореяи Ҷанубӣ таҷриба андӯзад сипас ба Ватан баргашта идеяҳояшро амалӣ намояд.
Ҳафизуллоҳ Тоҳирӣ
