Ин навбат мо дар барномаи навбатии “Бол” бо Нилуфар Ҳомидова, донишҷӯи соли чоруми Донишгоҳи амрикоии Осиёи Марказӣ доир ба таҳсилу кор дар ин муассиса, бурсияи ба даст овардааш, сайёҳат, блогинг ва нақшаҳои ояндааш суҳбат кардем.
Нилуфар пас аз хатми мактаби миёна ба беш аз 10 донишгоҳи хориҷӣ ҳуҷҷат супорид ва ба ӯ муяссар шуд, ки дар Донишгоҳи амрикоии Осиёи Марказӣ дохил шавад.
«Фикр мекунам, берун аз ҷумҳурӣ хондан барои ҳеҷ кас осон нест. Солҳои аввал барои ман ҳам хеле мушкил буд, дурӣ аз аҳли оила, муҳити нав, дарсҳои душвору пурра нофаҳмо ва дигар мушкилиҳо… Дар ниҳоят ҳамааш паси сар шуд.», — гуфт ӯ.
Нилуфар дар риштаи муносибатҳои байналмилалӣ таҳсил мекунад. Инчунин дар маркази машваратии донишгоҳ ба донишҷӯёни курсҳои поёнӣ раванди таҳсилро мефаҳмонад.
«Нарху наво дар Бишкек нисбат ба Душанбе гаронтар аст, вале ман танқисӣ намекашам, зеро, идрорпулӣ ва маошам бароям мерасад.», — илова кард Нилуфар.
Ин тобистон аз тариқи барномаи сайёҳие Нилуфар ба як қатор давлатҳои Аврупо сафар карда, ба ин васила ҷаҳонбинии хешро фаррох кард.
Нилуфар дар Instagram фаъол буда, ба обуначиҳояш дар бораи таҳсил дар хориҷи кишвар, маконҳои сайёҳӣ, худсозӣ ва ғайра маълумот медиҳад.
Инчунин дар якчанд чорабинӣ ҳамчун ментор барои таҳсили ҳамватанон дар хориҷи кишвар, махсусан дар Донишгоҳи амрикоии Осиёи Марказӣ мусоидат кардааст.
Ҳафизуллоҳ Тоҳирӣ
