Давоми соли хониши 2021-2022 муҳассилини литсей барои хонандагони болаёқати шаҳри Хуҷанд дар беш аз 15 олимпиадаи фаннии байналмиллалӣ дар кишварҳои Амрико, Туркия, Таиланд, Малайзия, Сингапур, Бразилия, Русия, Ҳиндустон, Олмон, Британияи Кабир ва Фаронса иштирок карда 493 медал (тилло, нуқра ва бринҷӣ) ба даст овардаанд.
Аз миёни иштирокчиён 12 нафар хатмкунанда дар ҳаҷми 2,5 миллион доллар бурсияи омӯзишӣ ба даст оварданд, ки барои идомаи таҳсил дар беш аз 20 донишгоҳи бонуфӯзи Амрико ва мамолики дигар имконият медиҳад. Онҳо бо ин маблағ чаҳор сол ройгон таҳсилу иқомат мекунанд.
Махлиёхон Авзалова хонандаи синфи 11-и литсей ҳафтае пештар дар ҳаҷми 96 ҳазор доллар бурсияи Донишгоҳи Крейтони Аёлоти Амрико гардид. Ӯ давоми як соли ахир дар олимпиадаҳои фосилавии FISO, Math Chellenj иштирок карда, мақомҳои намоёнро касб карда буд. Авзалова мегӯяд, бо ин миқдор маблағ чаҳор сол аз рӯйи ихтисоси табиатшиносӣ ройгон таҳсил карда метавонад. Ин толибилм аз синфи 10 ба ин сӯ дар олимпиадаҳои байналмиллалӣ иштирок мекунад ва сирри дарёфти роҳхат ба яке аз донишгоҳи бонуфузи ҷаҳонро натиҷаи ғолибиятҳояш бо забони англисӣ ва тарзи дурусти навишти эссе медонад.
“Ду навъи эссе ҳаст, якеро дар бораи хеш мегӯӣ ва дуввумро навишта ба донишгоҳҳо мефиристед. Эссе бо забони англисӣ навишта мешавад, онҳо мехонанд ва таҳқиқ мекунанд, ки чаро маҳз донишгоҳи онҳоро интихоб кардед. Бояд бо ҳамон шакле нависед, ки ба талабот ҷавоб диҳад. Ман аз Донишгоҳҳои Амрико дар Балгария, Донишгоҳи Амрико дар Осиёи Марказӣ, ки дар Қирғизистон воқеъ аст, роҳхат ба даст овардам. Донишгоҳи аввалиро интихоб кардам, ки дар ин ҷо имкониятҳо бештар буда, профессорону омӯзгорони ботаҷриба дарс мегӯянд.”,-нақл кард Маҳлиё Авзалова.
Амирбек Зокиров, як хатмкунандаи дигари литсей барои хонандагони болаёқати шаҳри Хуҷанд низ чанде қабл 150 ҳазор доллар бурсияи донишгоҳи Волши аёлоти Оҳаёи Амрикоро ба даст овард. Ӯ мехоҳад таҳсилро дар ин донишгоҳ аз рӯйи ихтисоси тиҷорат ва соҳибкорӣ идома диҳад. Амирбек низ давоми як соли хониш дар олимпиадаи фосилавии Анталия баргузор шуда буд аз фанни забони англисӣ мақоми ифтихориро касб кард. Ӯ дар дар олимпиадаҳои дигари байналмиллалӣ ба монанди Фисо, Хиппо, Коперникус низ иштирок кардааст.
Вай афзуд, панҷ сол дар мактаб-литсей таҳсил кард ва забони англисиро омӯхт. Дар ниҳоят ба орзуяш расид.
“Мақсади асосии ман ин аст, ки аз донишҳои байналхалқӣ бархӯрдор шуда ба Ватан бар мегардаму ҳамчун соҳибкори инфиродӣ кор хоҳам кард.”
Фирдавс Муҳаммадҷонов, хатмкунандаи дигар низ 16 ҳазор доллар бурсияи таҳсилро соҳиб шудааст. Ӯ барандаи як қатор олимпиадаҳои байналмилалии Hippo, IMEC аз фанҳои математика ва забони англисӣ аст ва имсол дар Алмаато ғолиби ҷойи якум ва соҳиби гранти омӯзишӣ шуд.
Моҳи апрели имсол Алишер Қосимов хонандаи синфи 11-и ин литсей 1 миллион доллар гранти омӯзишӣ дар 8 донишгоҳи бонуфӯзи Амрико ва Шветсарияро ба даст оварда буд. Омӯзгорон мегӯянд, ӯ дар ниҳоят тасмим гирифт, ки дар яке аз донишгоҳҳои Ню-Йорки Амрико аз рӯи ихтисоси асабшиносӣ таҳсилашро идома диҳад. Донишгоҳҳои хориҷа ба ин хонандаи тоҷик баъди пирӯзиҳояш дар чанд олимпиадаи байналхалқӣ аз фанҳои математика ва забони англисӣ таваҷҷӯҳ карда буданд.
Сураёхон Неъматзода, директори МДТ “Литсейи барои хонандагони болаёқат”-и шаҳри Хуҷанд мегӯяд, дар ин муассиса 600 хонанда таҳсил мекунад.
Таҳсил дар ин муассиса комилан бо забони англисӣ аст ва забондонӣ ба 470 нафар хонанда имкон дод, ки ба ҳаракати олимпӣ шомил шаванд. Хонум Сураёхон Неъматзода мегӯяд, муҳассилини ин мактаб-литсей давоми як соли хониш дар олимпиадаҳои байналмиллаӣ соҳиби 401 ҷойи ифтихорӣ шуданд. Аз 41 нафар хатмкунандагон 12 нафар ба донишгоҳҳои Амрико, 30 нафар ба донишгоҳҳои Ҷопон, Шветсария, Англия ва боқимонда ба донишгоҳҳои олии Тоҷикистон ҳуҷҷат супурдаанд.
Ҳоло боз як гурӯҳ хонандагон барои иштирок дар олимпиадаи байналхалқӣ аз фаннҳои дақиқу англисӣ дар Олмон ва шаҳри Лондон роҳхат гирифтаанд ва моҳҳои наздик дар он ширкат мекунанд.
Ҳалим Ҷураев
