Майсара Қурбонова дар шаҳри Ҳисор зиндагӣ мекунад. Шавҳараш дар муҳоҷират буда, ин зан 4 фарзанди духтари марҳумашро тарбия мекунад.
Майсара барои ба камол расондани ин ятимон кишоварзӣ менамояд, дар замин сабзавот ва дигар маҳсулоти полезӣ кишт намуда, дар зарфҳои шишагин хуриш ва анвои гуногуни маҳсулотро барои зимистон омода ва ба фурӯш мебарорад. Муштариёни зиёде дорад. Ҳатто муҳоҷирон аз Русия ба ӯ фармоиш медиҳанд, ки тариқи ҳавопаймо хӯришҳои таҳиякардаашро фиристад.
Ин зан дар доираи лоиҳаи “Реинтегратсия барои занони зери хатар ва қурбониёни хушунат дар ноҳияҳои тобеи Тоҷикистон”, ки бо маблағгузори Созмони байналмилалии “Acted” аз ҷониби Ташкилоти ҷамъиятии “Маърифати шаҳрвандӣ” амалӣ гардид, ба омӯзиш фаро гирифта шуд.
Майсара дар ин омӯзиш банақшагирии тиҷорат ва рушди соҳибкориро дар баробари дигар мавзӯҳо аз худ намуд.
Марҳилаи аввали силсилаомӯзишҳои дурӯза аз санаи 15 то 28 феврали соли равон ва марҳилаи дуюми он аз 28 март то 5 апрел баргузор гардида буд. Дар умум, 128 зан дар омӯзишҳои “Тавонмандсозии иҷтимоӣ ва иқтисодии занон” дар доираи лоиҳаи «Реинтегратсия барои занони зери хатар аз шаҳру навоҳии Ҳисор, Шаҳринав ва Турсунзода” ширкат карда буданд.
“Дар доираи лоиҳа давоми 25 рӯз дарс гузашта хеле чизҳоро омӯхтам. Баъд аз омӯзиш лоиҳаи хешро пешниҳод кардем, ки дастгирӣ ёфт ва ба ман яхдон, дег, зарфи обгирӣ ва сарпӯшмаҳкамкунак дода шуд. Ман ба ин чизҳо ниёз доштам. Муштариёни зиёд дорам. Онҳо ба ман фармоиш медиҳанд.Ташаккур ба ин созмонҳо, ки таҷҳизоти заруриро барои мо пешниҳод карданд.”,-гуфт Майсара Қурбонова.
Акнун Майсара метавонад барои коҳиш додани камбизоатӣ ва ҳалли мушкилоти иҷтимоии хеш фаъолияташро беҳтар намояд, зеро, бо дарёфти таҷҳизот имконоташ бештар шуд.
Дар Тоҷикистон лоиҳаи қонун “Дар бораи соҳибкории иҷтимоӣ” таҳия шудааст, ки то охири соли равон бояд қабул гардад. Мақсад қонун фароҳам овардани шароити муфид барои дастгирии қишри осебпазири ҷомеа, аз ҷумла, занони танҳо, ятимон, ашхоси камбизоати кишвар, ҳам аз тарафи давлат ва ҳам аз ҷониби ҷомеа равона шудааст.
