Омӯзиши таҷрибаи ширкатҳои кишвари ҳамсоя дар самти коркарди хушкмева

Ҳайъати Тоҷикистон иборат аз намояндагони 13 корхонаи истеҳсол ва коркарди хушкмева ва ду ассотсиатсия соҳавӣ аз сафари омӯзишӣ ба Ӯзбекистон баргашт. Зимни ин сафар соҳибкорон ва иттиҳодияҳои соҳавӣ бо таҷрибаи пешрафтаи ширкатҳои кишвари ҳамсоя дар самти истеҳсол ва коркарди хушкмева шинос шуда, барои барқарор намудани робитаҳо ва ба роҳ мондани ҳамориҳо имкон пайдо намуданд.
Сафар аз 10-ум то 14-ум августи 2024 сурат гирифт ва дар ҷараёни он соҳибкорони соҳаи кишоварзии Тоҷикистон бо занҷираи коркарди меваи хушк дар шаҳрҳои Фарғона ва Самарқанд шинос шуданд.
Ҳайъати Тоҷикистон аз ширкатҳои маҳаллии коркарди хушкмева дар ҳар ду шаҳр боздид карда, бо равандҳо ва фанновариҳои истеҳсолӣ ошно шуданд.
Ҳамчунин, сафар ба аъзои ҳайъат имкон фароҳам овард, то тамосҳои тиҷоратӣ барқарор намоянд ва имкониятҳои дастрасӣ ба ашёи хом ва бозори фурӯшро баррасӣ намоянд. Онҳо, ҳамчунин, бо вазъи пешбурди соҳибкорӣ дар ҷумҳурии ҳамсоя, ба монанди низоми андоз ва андозбандӣ, равандҳои воридоту содироти маҳсулот, дастрасӣ ба маблағ ва қарзҳои бонкӣ, пуштибонии давлат аз соҳа маълумот пайдо карданд. Дар баробари табодули таҷрибаи тиҷорӣ, ин ибтикор ҳамчунин ҳадаф дошт, то миёни ассотсиатсияҳои соҳавӣ низ барои ҳамкориҳои оянда тамос барқарор гардад.