Абубакр Назаров 9-сола буда, аллакай устои мошин аст. Падараш аввали имсол аз муҳоҷират баргашт ва ба таъмири мошинҳо пардохт. Абубакр ҳамарӯза ба коргоҳи падар омада, ба падар ёрӣ медоду ҳам ба корҳои ӯ зеҳн.
“Ман то соли 2013 дар Русия ронандаи таксӣ будам. Ҳамон сол назди устои мошинам рафта хоҳиш кардам, ки ба ман ин касбро омӯзонад. Ҳамин тавр, 1 сол шогирд истода ин корро омӯхтам. Аввали соли ҷорӣ ба Ватан баргашта тасмим гирифтам, ки корамро дар Ватан идома диҳам. Аз рӯзҳои аввал Абубакр бо ман дар ин устохона мошинҳои муштариёнро таъмир мекунад.”, — мегӯяд Хуршед Назаров.
То чанд моҳи пеш Абубакр саргарми дарсу бозиҳои кӯдаконааш буд. Акнун таътили тобистона дар устохонаи падараш ба таъмири мошинҳо машғул аст.
Абубакр ҳоло чароғҳо, “стартер”, “генератор” ва чанд бахши дигари мошинҳоро хуб мефаҳмад ва таъмир мекунад.
“Гоҳо муштариён меоянду бе ҳузури ман Абубакр мошини онҳоро таъмиру ҳисобӣ карда, ҷавоб медиҳад. Вале аксар вақт ба муроҷиати муштариён худам расидагӣ мекунам. Агар донам, ки писарам аз ӯҳдаи кор мебарояд, корро вогузор менамоям.”, — илова кард Падари Абубакр.
Ба гуфтаи падараш, Абубакр аз хурдӣ ба ин кор шавқи зиёд дошт ва ҳамеша дар таъмири мошинҳои аҳли оила кумак мерасонид.
Ба қавли Хуршед Назаров, Абубакр дар мактаб бо баҳои хубу аъло мехонад ва новобаста аз он ки пас аз хатми мактаби миёна кадом касбро интихоб мекунад, таъмиргари мошин касби иловагияш хоҳад буд.
Абубакр то чанд моҳи дигар соҳиби компютери мошин мешавад ва назди устое шигирд истода, ин соҳаро хуб аз худ карданист то тариқи компютери махсус “дард”-и мошинро зуд дарк намуда, онро рафъ намояд.
Ҳ. Тоҳирӣ
