73 шаҳрванди Кореяи Ҷанубӣ, ки дар Камбоҷа бо гумони даст доштан дар амалиётҳои қаллобии онлайнӣ боздошт шуда буданд, имрӯз, 23 январ бо парвози махсус ба ватан баргардонида шуданд. Ин бузургтарин бозгардондани гумонбарони ҷиноят аз як кишвар дар таърихи Кореяи Ҷанубӣ ба ҳисоб меравад.
Ба иттилои Дафтари президенти Кореяи ҷанубӣ, ин афрод пас аз тафтишоти муштараки пулиси Кореяи Ҷанубӣ ва Камбоҷа боздошт шудаанд ва ин нафарон аз 869 қурбонии кореягӣ дар маҷмӯъ 48,6 миллиард вон (тақрибан 33,1 миллион доллари ИМА) тасарруф кардаанд.
«Пас аз нишастани ҳавопаймо гумонбарон фавран ба ҳабс гирифта шуданд ва барои идомаи тафтиш ба идораҳои пулиси маҳаллӣ дар саросари кишвар интиқол дода шуданд. 70 нафар ба иштирок дар қаллобии онлайнӣ, се нафари дигар бо иттиҳоми гаравгонгирӣ бо мақсади ғоратгарӣ ва қиморбозӣ гумонбар ҳастанд.»,-менависад en.yna.co.kr
Гурӯҳи муштараки тафтишотӣ дар Камбоҷа ба ҳафт пойгоҳи қаллобон, аз ҷумла дар Сиануквилл, Пойпет ва вилояти Мондулкири ҳамла анҷом дода, гумонбаронро боздошт намудааст.
Мақомот ҳамчунин чанд ҷавони тақрибан 20-соларо, ки дар ин пойгоҳҳо боздошт ва шиканҷа мешудаанд, наҷот доданд.
Ин бозгардонии оммавӣ пас аз марги як донишҷӯи кореягӣ дар Камбоҷа (моҳи августи 2025) бар асари шиканҷа дар як ҳодисаи эҳтимолии қаллобии корӣ сурат гирифт, ки даъватҳо барои вокуниши ҷиддӣ ба ҷиноятҳо алайҳи шаҳрвандони Кореяи Ҷанубиро дар он кишвар ба бор овард.
Қаблан, моҳи октябри соли гузашта, гурӯҳи 64 шаҳрванди Кореяи Ҷанубӣ низ пас аз боздошт дар Камбоҷа бо гумони иштирок дар қаллобии онлайнӣ барои тафтиш ба ватан баргардонида шуда буданд.
