Нозанин Комилова, муҳассили Муассисаи таълимии давлатии Русияву Тоҷикистон «Мактаби миёна бо омӯзиши амиқи фанҳои алоҳида дар шаҳри Хуҷанд ба номи А. Чехов» ва хонандаи мактаби хусусии Камоли Хуҷандӣ Абӯбакр Орипов дар Олимпиадаи байналмилалии «TEENEAGLE 2023» иштирок карданд.
«Нозанин мақоми дуюм ва Абӯбакр ҷойи сеюмро дар ин олимпиадаи бонуфузи байналмилалӣ ба даст оварданд.»,-хабар медиҳад маркази матбуоти Раиси шаҳри Хуҷанд.
Даври ниҳоии Олимпиадаи байналмилалии «TEENEAGLE 2023», аз фанни забони англисӣ рӯзҳои 18 то 25 июни соли равон дар Донишгоҳи Брунели шаҳри Лондони Подшоҳии Муттаҳидаи Британияи Кабир баргузор гардид. Дар даври ниҳоии олимпиада, ғолибони даврҳои фосилавии озмун аз 55 кишварҳои олам, зиёда аз 750 нафар хонандагон иштирок намуданд. Ҳайати иштирокчиёни олимпиада аз Тоҷикистон 59 нафар буд.
Акс аз шабакаи интернет
