Муҳаммад Ҳакимов, хонандаи синфи 7-и Муассисаи таҳсилоти миёнаи умуми №14-и шаҳри Бохтар аст, ки қариб ҳамаи пойтахтҳои кишварҳои ҷаҳонро медонад. Ҷуғрофия, таърих-фанҳои дӯсдоштааш ҳастанд.
Дар 8-солагӣ падару бобояш дар бораи таърихи кишварҳои пешрафтаи ҷаҳон нақл мекарданд. Маҳз ҳамон қиссаҳои ҷолиб Муҳаммадро ба хондан ва аз худ кардани фанҳои ҷуғрофия ва таърих моил кард.
Муҳаммад Ҳакимов ҳамеша бо омодагии ҷиддӣ ба дарсҳо ҳозир мешавад. Ба иттилои волидонаш, ӯ бештари вақти худро ба мутолиа мегузаронад.
“Ҳар вақте падарам аз кор меояд, аз ман мепурсад, ки писарам имрӯз номи кадом поитахти давлатро аз худ кардӣ. Пурсиши падар масъулияти маро барои омӯхтан бештар мекунад ва хушҳол мешавам. Барои он ки ба суоли падарам ҷавоби мусбат диҳам, ба хондани китоб бештар машғул мешавам.”,- нақл намуд Муҳаммад Ҳакимов.
Омӯзгори фани география барои шинохти давлатҳо ва дар куҷо ҷойгир будани онҳо ба хонандагон бештар аз рӯи харита дарс мегузарад. Муҳаммад Ҳакимов, ки яке аз хонандаҳои фаъол дар муассиса ба ҳисоб рафта, дар дарсҳо бо харита бештар кор мекунад.
Зебонисо Қосимова, устоди Муҳамад Ҳакимов мегӯяд, Муҳаммад бо дониш ва рафтор аз дигар ҳамсабақонаш фарқ мекунад ва ғайр аз фанни география ба фанҳои дигар низ таваҷҷуҳи хоса дорад. Дар озмуну олимпиадаҳо ва чорабиниҳои муассиса ва ноҳия фаъолона иштирок мекунад.
Муҳаммад Ҳакимов мехоҳад табиб шавад. Ҳоло фанҳои кимиё ва биологияро бештар меомӯзад.
Аҳлиддини Муборакшоҳ
