Камиль Нурматов 20 сол дошта, навоварӣ, овозхонӣ мекунад ва варзишгар аст.
Камиль Нурматов дар Федератсияи Русия ба дунё омада, дар чаҳорсолагӣ бо волидон ба зодгоҳи падарӣ-ноҳияи Ашти вилояти Суғд кӯч мебандад. Пас аз хатми мактаби миёна (соли 2018) ба Литсейи техникии шаҳри Душанбе дохил шуда, соли 2020 хатм мекунад. Ҳамон сол дар Олимпиадаи байналмилалии довталабони хориҷӣ барои дохил шудан ба Донишгоҳи индустриалии Тюмен ширкат ва сазовори ҷойи аввал мегардад. Аммо бо сабаби бемории ҳамагири COVID-19 ба ин донишгоҳ ҳуҷҷатҳояшро пешниҳод карда наметавонад.
Камиль Нурматов ҳоло донишҷӯи соли сеюми риштаи табаитшиносии Донишгоҳи славянии Русияву Тоҷикистон мебошад. Ӯ аз овони хурдӣ навоварӣ мекардаасту, ҳар гуна дастгоҳ месохтааст.
“Дар хурдиам ҳар гоҳе падарамро машғули таъмири мошин медидам, аз ӯ зиёд суол мекардам ва шавқу ҳавасам барои сохтани ҳар гуна таҷҳизот дучанд мегардид. Аз ин хотир бо истифода аз ашёҳои гуногун ҳар гуна асбобҳои кучак месохтам. Маҳз ҳамин майлу рағбати маро падарам дида, бароям як устохонаи алоҳида бунёд кард ва ман ҳамарӯза дар он ҷо кор мекардам. То ба имрӯз таҷҳизоти зиёде сохтам, ки аз миёни онҳо дастгоҳи «ЭКО-плюс» маъруфият пайдо намуд.”,-мегӯяд Камиль Нурматов.
Таҷҳизоти “ЭКО-плюс” самаранокиро бештар, сарфи сузишворӣ камтар мекунад, инчунин ҷараёни электрикӣ ҳосил менамояд. Камиль Нурматов дар озмуни ҷумҳуриявии “Илм – фурӯғи маърифат” таҷҳизоти “ЭКО-плюс”-ро пешниҳод ва сазовори ҷойи намоён гардид. Ҳамзамон, дар озмуни “Bus&IT 2022”, ки дар Донишгоҳи славянии Русияву Тоҷикистон баргузор гардид, иштирок намуда, ҷойи дуввумро сазовор шуд.
Камиль Нурматов овозхонӣ мекунад. То кунун 27 суруд сароидааст, ки аз ин миён матни 8 суруд моли ӯст. Сурудҳои Камиль Нурматов дар шабакаҳои иҷтимоӣ ҳаводорони зиёде доранд. Ҳамзамон, ӯ ғайр аз ихтироъкориву овозхонӣ, инчунин ба варзиш машғул буда, дар чандини мусобиқа дастболо гардидааст.
Баҳруллои М.
