Дар шаҳри Минск мусобиқаи байналмилалии «Ҷоми Рушд-2023» ба анҷом расид. Аз рӯи натиҷагирии мусобиқа ду бозигари тими ҷавонони Тоҷикистон (U-17) якбора дар қатори беҳтаринҳо қарор гирифтанд.
Капитани тими ҷавонони Тоҷикистон Абӯбакр Сулаймонов беҳтарин бозигари Ҷоми Рушд-2023 ва ҳамлагар Раббонӣ Камолов нишонзани беҳтарин дониста шуд.
Мунтахаби ҷавонони Тоҷикистон (U-17) «Ҷоми Рушд-2023»-ро дар Минск бидуни бохт ба поён расонд. Дар марҳилаи гурӯҳии мусобиқот бо тимҳои миллии Русия (1:1) ва Беларус (2:2) мусовӣ анҷом дода, ба тими Эрон (3:1) пирӯз шуд. Дар вохӯрӣ барои мақоми сеюм ҷавонони мо ба тими Русия (U-16) бо ҳисоби 3:0 пирӯз шуданд.
Барандаи «Ҷоми Рушд-2023» мунтахаби ҷавонони Русия (U-17) гардид, ки дар финал бар тими Қазоқистон (3:1) пирӯз шуд.
