Меҳмони навбатии мо дар барномаи “Бол” Зикрулло Амирӣ, донишҷӯи Донишгоҳи техналогияҳои иттилоотӣ, механика ва оптикаи Санкт-Петербург (Университет Информационных Технологий, механики и оптики) мебошад.
Зикрулло соли дуюм аст, ки дар риштаи барномасозӣ таҳсил мекунад.
Ӯ дар баробари таҳсил ба коркарди барномаи муаллифии хеш машғул аст, ки аз ӯ “Дӯсти маснӯъӣ” ном мебарад. Барнома бо корбар озодона суҳбат бояд кунад.
«Бисёр корҳоест, ки мо бояд анҷом диҳем, вале бо сабаби набудани вақт дасткутоҳем. Бинобар ин, барномае ҳамчун дастёр лозим аст. Яъне, корбар метавонад ба барнома супориш диҳад ва барнома онро дар хотир сабт кунад ва вақти зарурӣ ёдрас менамояд. Ҳамчунин ба мо аз шабакаи интернет маълумот лозим шуд, барнома ин мушкилро ҳал мекунад.»,-мегӯяд Зикрулло.
Зиёда аз як моҳ аст, ки Зикрулло сари ин лоиҳа кор мекунад ва ният дорад, ки то охири сол онро ба анҷом расонад ва ба мардум дастрас кунад.
Дар instagram ҳам фаъол аст ва ба обуначиҳояш дар бораи техналогия машварат медиҳад.
«Моҳи октябри соли гузашта тасмим гирифтам курси барномасозӣ ташкил кунам. Хостам аз блогерҳо реклама харидорӣ ва корамро оғоз намоям, вале як дӯстам маслиҳат дод, ки беҳтараш худ видео нашр кунам ва ба ин шакл обуначӣ пайдо месозам. Ҳамин тавр ҳам шуд ва рӯзҳои наздик мо аввалин курсамонро оғоз мекунам.»,-илова кард Зикрулло.
Барои аввал ба 10 шогирд давоми 2 моҳ фосилавӣ сохтани лоиҳаҳо ва телеграм-ботро меомӯзонад.
Пас аз хатми донишгоҳ дар минтақаи Кӯлоб маркази омӯзишие созмон доданист то барномасозони маҳаллиро омода намояд.
Ҳафизуллоҳ Тоҳирӣ
