Зардушт Баҳромзода донишҷӯи Донишгоҳи давлатии Олтой буда, стипендияи байналмилалии “Дурахшандагон”-ро барои таҳсил ба даст оварда буд. Ӯ фаъолтарин донишҷӯи ин муассиса маҳсуб ёфта, ҳамчунин раиси Анҷумани донишҷӯёни хориҷии донишгоҳ аст.
“Насли мо ба сиёсатшиносӣ рағбати кам дорад, аксарият блогерӣ, барномасозӣ, кори ороиш (дизайн) ва дигар касбҳои навро интихоб мекунанд. Аммо ба андешаи ман, сиёсатшиносӣ бисёр муҳим аст ва барои давлату миллатам дар оянда хизмати калон карда метавонам. Чунин сухан низ ҳаст: ҳар нафаре бо сиёсат сари кор намегирад, сиёсат бо ӯ сари кор мегирад!”, — гуфт ӯ.
Соли аввали таҳсил надонистани забон барояш мушкил эҷод мекард. Бо роҳнамоии устодон сатҳи забондониашро хуб кард ва ҳоло бо баҳои аъло таҳсил дорад.
Барнома маблағи таҳсилро мепӯшонад, Пули хобгоҳу хӯрок ва либос аз ҳисоби худаш ҳаст. Донишгоҳ моҳона 4 ҳазор рубл идрорпулӣ медиҳад.
“Маблағи идрорпулӣ кам аст, вале бояд бигӯям, ки даромадҳои дигар ҳам ҳастанд. Масалан, барои иштирок дар конфронсҳо, фаъол будан дар корҳои ҷамъиятии донишгоҳ ва ғайра пули иловагӣ мегирем.”, — илова кард ӯ.
Ду моҳ қабл Зардушт раиси Анҷумани донишҷӯёни хориҷӣ интихоб гардид. Ӯ ба мушкилии донишҷӯён расидагӣ мекунад.
“Мо бо ҳамватанон самимӣ ҳастем ва ҳамеша дар паҳлӯи ҳам мебошем. Дар ин донишгоҳ аз тамоми минтақаҳои Тоҷикистон таҳсил мекунанд ва мо зиёд бо ҳам нишаста, доир ба вазъи имрӯза ва нақшаҳои ояндаамон суҳбат мекунем.”, — нақл кард ӯ.
Зардушт ния дорад, ки пас аз хатми донишгоҳ зинаи магистратураро дар Академияи дипломатии Русия ба паён расонда, сипас ба Ватан баргашта, тибқи ихтисос хизмат намояд.
Ҳафизуллоҳ Тоҳирӣ
