Ширкатҳои сайёҳии Тоҷикистон ва Узбекистон дар доираи Форуми саёҳативу тиҷоратӣ, ки 27 декабр дар шаҳри Душанбе баргузор гардид, 21 созишномаи ҳамкорӣ ба имзо расониданд.
Созишнома оид ба ҳамкорӣ дар соҳаи сайёҳӣ ба рушди робитаҳо дар самтҳои афзалиятнок, аз ҷумла мубодилаи иттилоот доир ба рушди сайёҳӣ тавассути маводи нашрӣ, филмҳо, гузаронидани чорабиниҳои тарғиботӣ, конфронсҳо, машғулият, ташкили намоишгоҳҳо ва барои ба роҳ мондани ҳамкорӣ миёни ширкатҳои сайёҳии ватанӣ ва ширкатҳои сайёҳии Узбекистон нигаронида шудааст.
Ба иттилои Кумитаи рушди сайёҳии кишвар, дар маҷмӯъ миёни ширкатҳои сайёҳии Тоҷикистон ва Узбекистон оид ба ҷалби сайёҳон ба кишварҳои ҳамдигар бештар аз 100 шартномаи ҳамкорӣ ба имзо расидаанд.
Таҳлилҳо нишон медиҳанд, ки зимни ташриф ба Тоҷикистон сайёҳони Узбекистон ба намудҳои сайёҳии табобатӣ-солимгардонӣ, экологӣ ва сайёҳии зиёратӣ бештар майлу рағбат доранд.
Акс аз сомонаи Кумитаи рушди сайёҳӣ
