Ба иттилои Созмони Милали Муттаҳид, айни ҳол 1,2 миллиард аҳолии сайёраро ҷавонони 15-24-сола ташкил медиҳад. Яъне, ин теъдод 16%-и аҳолии кураи замин ба ҳисоб мераванд. Ба таъкиди Созмони Милали Муттаҳид, дар сурати фароҳам овардани шароит барои таҳсил ва имконоти зарурӣ ба ҷавонон, онҳо метавонанд дар рушди Сайёра нақши муҳим бозанд. Аз ҷумла, ҷавонон бояд маълумот ва малакаҳои зарурӣ гиранд то дар рушди иқтисодиёт мусоидат намоянд.
Аммо аксари ҷавонон дар кишварҳои камбизоат ва дар ҳоли рушд зиндагӣ мекунанд. Аз 10 нафари аз 10 то 24-сола 9 нафараш дар кишварҳои камдаромад зиндагӣ менамоянд. Дар бархе кишварҳо 80 дар сади аҳолиро ҷавонон ташкил медиҳанд. Ҷавонони ин кишварҳо бо душвориҳои боз ҳам бузургтар дучор меоянд. Дастрасии маҳдуд ба таҳсил ва тиб доранд. Аз ҳама мушкил барои духтарон, махсусан дар маҳаллаҳои дурдаст аст, зеро, ҳуқуқу имкониятҳои онҳо хеле маҳдуд аст. Ҷавонон аз ақаллиятҳои этникӣ ва мазҳабӣ, гурезагон таҳти фишори шадидтар ва тамғагузорӣ қарор мегиранд…
Тоҷикистон яке аз кишварҳои дорои аҳолии ҷавон маҳсуб ёфта, мувофиқи таҳлилҳои оморӣ, 32,9%-и шумораи умумии аҳолии Тоҷикистонро ҷавонони аз 14 то 30-сола ташкил медиҳад. Синни миёнаи аҳолӣ дар мамлакат 25 солро дар бар мегирад. Дар 17 соли охир шумораи ҷавонон 33% зиёд гардида, дар ин давра ба ҳисоби миёна ҳамасола 1,9% шумораи ҷавонон дар ҳоли афзоиш мебошад.
Ҳамасола 10 ноябр дар ҷаҳон чун Рӯзи байналмилалии ҷавонон таҷлил мешавад. Ин рӯз ба ифтихори таъсиси Федератсияи умумиҷаҳонии демократии ҷавонон (World Federation of Democratic Youth, WFDY) ба миён омад. Зеро, соли 1945 аз 29 октябр то 10 ноябр дар шаҳри Лондон Конфронси умумиҷаҳонии ҷавонон баргузор шуд ва ба таъсиси ин рӯз сабаб гардид.
Аз фурсати муносиб истифода намуда, ҳамаи ҷавононро ба Рӯзи ҷаҳонии ҷавонон табрик мегӯем.
Акс аз манбаъҳои боз
