БОЛ — аз баландпарвозиҳо ба саросари олам ва аз кору таҳсили ҷавонони тоҷики хориҷи кишвар қисса мекунад. Меҳмони аввалини барномаи “Бол” Ситора Қодирова, духтури занона аст, ки дар шаҳри Анталияи Туркия кору зиндагӣ мекунад.
Ба нақли Ситора, баробари дохил шудан ба Донишгоҳи давлатии тиббии Тоҷикистон ба номи Абӯалӣ Ибни Сино тасмим гирифт духтури забондону ҷаҳондидаву кордон гардад на танҳо Тоҷикистон, балки дар хориҷ низ ӯро шиносанд.
Ҳамин тавр, пас аз хатми донишгоҳ як муддат дар бемористони давлатӣ фаъолият кард, сипас дар бемористони хусусӣ фаъолияташро идома дод. Бо гузашти андак вақт имкон пайдо кард, ки ба кишварҳои хориҷӣ барои омӯзиш ва такмили ихтисос равад. Дар омӯзишу ҳамоишҳои илмӣ ширкат намуда, донишашро такмил намуд.
Ҳоло барои мутобиқсозии дипломаш ба талаботи байналмилалӣ дар шаҳри Анталияи Туркия кору зиндагӣ дорад. Ба тамрин меравад, забони туркиро меомӯзад ва рӯзона чор соат дар беморхонае беморонро қабул менамояд.
Ҳамчунин, дар Instaggram фаъол аст. Наздики 40 ҳазор обуначӣ дорад ва моҳе ду бор бо аудитория саволу ҷавоб мекунад. Ин пурсишу посухро Ситора ба фоидаи тарафайн арзёбӣ мекунад. Зеро, агар аз як ҷониб мардум ба саволҳояшон посух гиранд, аз паҳлӯи дигар ӯ таҷриба меандӯзад.
Тоҷиконе, ки дар наздики манзили иҷораи Ситора иқомат мекунанд, ба онҳо кумаки тиббӣ мерасонад.
Ситора ба беш аз сад зани бефарзанд умед бахшид. Бо тавсияву табобати ӯ онҳо соҳиби фарзанд шуданд.
Ситора узви Хазинаи духтурон ва олимони Амрико ва Австрия мебошад. Ӯ формулаи осон ба ин муваффақият расиданашро дар донистани забонҳои хориҷӣ ва омӯзиши пайваста арзёбӣ мекунад. Дар ҳоли ҳозир забонҳои англисӣ, олмонию русиро медонад ва забони туркиро меомӯзад.
Ҳафизуллоҳ Тоҳирӣ
