Нафиса Зоирова, хонандаи синфи 4-уми Мактаби махсуси нобиноёни шаҳри Душанбе аст. Волидонаш дар шаҳри Ваҳдат зиндагӣ мекунанд ва Нафиса ҳафтае як бор ба дидорбинии онҳо меравад.
Нафиса дар оила фарзанди хурдӣ маҳсуб шуда, як бародару як хоҳар дорад. Падар ва бародараш низ маъюби гуруҳи дуюманд ва биноии заъиф доранд.
Нафиса дар мактаб бо баҳои аъло таҳсил мекунад. Ӯ шеъру сурудхониро дӯст медорад ва мехоҳад оянда муаллими суруд шавад.
Ӯ дар чандин озмуну чорабиниҳо иштирок ва мақомҳои ифтихориро соҳиб гардидааст. Дар ҳама чорабиниҳои муассиса ва зодгоҳаш фаъолона ширкат меварзад. Бори охир дар озмуни шаҳрии “Мо бо шумоем” ширкат намуд ва сазовори ҷойи аввал гашт. Сурудҳои Нигина Амонқуловаро бештар меписандад. Агарчи пайвастагии худро бо суруду мусиқӣ мебинад, вале ҳама фанҳоро хуб мехонад, шеъру афсонаҳои зиёд медонад.
Ба вуҷуди надоштани биноии чашм Нафиса барои худсозии хеш талош меварзад.
Муҳаммад Маҳмадзода
