Некрӯзи Сайфулло бештар чеҳранигорӣ мекунад. Тасвири шахсиятҳои машҳур ва нашри онҳо тариқи шабакаҳои иҷтимоӣ ба ӯ маҳбубият овардаанд. Некрӯз чеҳраҳоеро тасвир менамояд, ки барояш ҷолиб ҳастанд. Яке аз ин нафарон марҳум Сайф Раҳмизоди Афардӣ маҳсуб мешавад ва то кунун ҳудуди 20 акси Афардиро тасвир кардааст.
Некрӯз ҳангоми наврасӣ дар рӯзномае зиндагиномаи Сайф Раҳмизоди Афардиро мутолиа намуда, аз он замон таваҷҷӯҳаш ба навиштаҳои Афардӣ зиёд мегардад. То ҳол аз асарҳову филмҳои ӯ илҳом мегирад.
Ӯ хатмкардаи Донишкадаи давлатии санъати тасвири ва дизайни Тоҷикистон аст. Ба ғайр аз чеҳранигорӣ, китобҳоро мусаввар менамояд в то кунун анқариб тасвирҳои 15 китобро таҳия кардааст. Муаллифони китоб матни онро ба Некрӯз пешниҳод мекунанд. Некрӯз баъд аз мутолиа вобаста ба мазмуну мӯҳтавои асар расмҳои мухталиф тасвир мекунад ва баъдан ин расмҳо дар китоб ҷой дода мешаванд.
Фориғ аз ин корҳо ҳамчунин дар деворҳо низ наққошӣ менамояд. Бузургтарин кори девориашро дар чойхонаи “Сайёҳон”-и ноҳияи Восеъ анҷом додааст. Вале манбаи асосии даромадаш аз ҳисоби чеҳранигорӣ аст. Ҳамрӯза дархостҳои мухталиф мегирад. Тасвирҳои хурд 50 — 100 сомонӣ арзиш дошта, барои ин корҳои кучак маъмулан ду се соати худро сарф мекунад, вале тасвирҳои бузргтар вақти бештарро талаб мекунанд ва чунин тасвирҳоро то 600- 700 сомонӣ ба фурӯш мегузорад.
Ҳоло ӯ барои худ устохонаи алоҳида иҷора гирифта, мехоҳад корҳои бузургу ҷиддитарро анҷом диҳад.
Фурқати Низом
