Дастаи мунтахаби наврасони Тоҷикистон (U-16) дар ҷамъомади омӯзишиву машқии худ дар Анталияи Туркия бозии нахустини санҷишияшро пушти сар кард. Рақиби наврасони мо дар ин бозӣ мунтахаби наврасони то 16 солаи Булғористон буд.
«Бозӣ бо ҳисоби баробари 1 бар 1 анҷом ёфт. Голи дастаи мунтахаби наврасони Тоҷикистонро Масрур Ғафуров ба ҳадаф расонд.», -иттилоъ медиҳад Федератсияи Футболи Тоҷикистон.
Ёдрас мешавем, ки дар доираи баргузории ҷамъомади омӯзишиву машқӣ дар Анталия мунтахаби наврсони Тоҷикистон боз се бозии санҷишиву дӯстона мегузаронад. Дар бозии дӯюми дӯстона, ки рӯзи шанбеи 29-уми январ доир хоҳад шуд, дастаи Зайниддин Раҳимов бо наврасони то 17 солаи Академияи бошгоҳи футболи “Краснодар”-и Федератсияи Руссия бозӣ мекунад. Рӯзи душанбеи 31-уми январ бошад наврасони Тоҷикистон дубора бо ҳамсолони худ аз Булғористон бозӣ мекунанд. Бозии ҷамъбастии санҷишии худро дар доираи ҷамъомади таълимию машқӣ дар Туркия мунтахаби наврсони Тоҷикистон рӯзи 3-юми феврал муқобили наврасони худ аз давлати Мексика мегузаронад.
Баъд аз анҷоми ҷамъомади омӯзишиву машқӣ дар Анталияи Туркия дастаи мунтахаби наврасони Тоҷикистон ҷиҳати иштирок дар 18-умин мусобиқаи байналмилалии “Ҷоми Рушд” ба Мински Беларус сафар мекунад. Мусобиқаи мазкур аз 5 то 14 феврал баргузор хоҳад шуд.
Акс аз сомонаи http://fft.tj
