Донишгоҳи технологии Тоҷикистон баъд аз ду соли маҳдудиятҳои бемории ҳамагири «COVID-19» дубора ба баргузории чорабиниҳои ҳузурӣ оғоз бахшид. Қаблан чорабиниҳо онлайнӣ сурат мегирифтанд.
Таъсири бемории ҳамагири «COVID-19» монеи конфронсу мизҳои мудаввари илмӣ гардида буд. Бо пастшавии сатҳи беморӣ дар ҷаҳон чорабиниҳои ҳузурӣ дар ҳоли афзӯдан буда, Донишгоҳи технологии Тоҷикистон иттилоъ медиҳад, ки баъд аз ду сол дубора чорабиниҳои илмиро бо иштироки зиёди донишҷӯн ва омӯзгорон дар Донишгоҳи технологии Тоҷикистон ба роҳ монд.
Дирӯз, 22 апрел дар донишгоҳи мазкур ҳамоиш дар мавзӯи «Ҳамбастагии илм бо истеҳсолот дар раванди саноатикунонии босуръати Ҷумҳурии Тоҷикистон» доир гардид, ки дар он донишҷӯён вобаста ба ин мавзӯъ маърӯза намуданд.
Яке аз бахшҳои он “Сармояи инсонӣ ва тафакури созанда дар раванди саноатикунонии босуръат” буд, ки зери назари муовини декани оид ба илм ва инноватсия факултети технология ва дизайн Фарзона Салимова бо иштироки омӯзгорон ва донишҷӯёни донишгоҳи мазкур як рӯз қабл аз ин ҳамоиш доир шуда буд.
