Беҳрӯз Убайдов соли панҷум аст, ки дар яке аз сиркҳои Чин бо аспбозиаш меҳмонони сиркро хушҳол месозад.
Ин ҷавони тоҷик пас аз хатми мактаби миёна ба донишгоҳ нарафт. Ӯ аз бародараш Фирӯз, ки таҷрибаи кор дар сиркҳои Тоҷикистону Хитойро дошт, аспбозиро муддати як моҳ омӯхт ва ба Хитой сафар кард.
Ӯ аз замони кӯдакӣ ба аспсаворӣ шавқи зиёд дошт ва дар андак замоне бо роҳнамоии бародараш аспбозиро аз худ кард ва дар яке аз Сиркҳои маъруфи Чин ба кор пардохт.
Беҳрӯз мегӯяд, кор дар сиркҳои Хитой осон нест, вале вақте корро дӯст медорӣ ва аз ин ҳисоб нон пайдо мекунӣ, мушкилиҳо садди роҳ шуда наметавонанд.
“Кор бо асп бисёр мушкил аст. Агар аз болои асп ногаҳон афтӣ, ҳатман осеб мебинӣ. Аммо меҳрам ба ин кор зиёд аст ва бидуни ин кор худамро тасаввур карда наметавонам.”, -таъкид меварзад ӯ.
Қаҳрамони мо аспсаворӣ намекунад, балки аспбозӣ мекунад. Ӯ дар ҳама ҳолат метавонад болои асп барояд ё аз он поён шавад. Ҳатто дар ҳолати давидани асп болои асп рост меистад.
Беҳрӯз аз шароити кору зиндагиаш дар Чин қаноатманд аст. Роҳбарияти сирк ба ӯ кору ҷойи хоб фароҳам овардаанд.
Беҳрӯз бо сирки чинӣ шартномаи 10-сола дорад. Охирин бор соли 2018 аз Ватан дидан карда, ният дорад пас аз як ё ду сол рухсатӣ гирифта ба дидорбинии аҳли оила ояд. Ӯ ҳоло 25 сол дорад ва оиладор нест.
Ҳ. ТОҲИРӢ
