Шодмон Ризоев баъди ба даст овардани медали тилло дар Чемпионати “Осиё-Уқёнусия 2021” боз барои иштирок дар Бозиҳои олимпии Париж-2024 омодагӣ мебинад.
Шодмони 21-сола яке аз варзишгарони муваффақи кишвар буда, 20-уми декабри соли 2001 дар деҳаи Деҳқонободи шаҳри Кулоб ба дунё омадааст. Ҳанӯз аз замони хурдсолӣ ба варзиш майлу рағбати зиёд пайдо мекунад. Аввалин майдондориашро аз мусобиқаҳои гуштин, ки дар ҷашни Наврӯз баргузор мешаванд, шурӯъ намудааст.
«Дар кадом деҳае, ки гуштингирӣ ташкил мешуд, ман иштирок мекардам. Гоҳҳо ғолиб, гоҳҳо мағлуб мешудам, вале руҳафтода намегардидам. Амакам Хайриддин Ризоев маро зиёд мушоҳида мекард. Як рӯз ба ман таклиф кард то ба варзишгоҳ равем. Ман розӣ шудам ва ӯ маро ба шаҳри Душанбе оварда ба мактаб-интернати варзишӣ супурд. Дар ин мактаб зери назар устодам Салим Ахмедов тамринро оғоз кардам«. – ба ёд меорад Шодмон Ризоев.
Аз соли 2013 Шодмон Ризоев ба майдони мусобиқаҳои варзишӣ роҳ ёфт. Тӯли як сол дар чандин мусобиқаҳои шаҳриву ҷумҳуриявӣ ширкат карда, сазовори ҷойҳои намоён гаштааст. Ӯ инчунин барандаи Ҷоми Президент ва Ҷоми Осиё мебошад.
«Аввалин иштирокам дар мусобиқаи берун аз кишвар соли 2014 буд, ки ба Қазоқистон сафар намудам, вале дар даври аввали сабқат мағлуб шудам. Баъдан ба Ватан баргашта, тамрину машқҳоямро зиёд кардам. Соли 2017 барои иштирок дар мусобиқаи Ҷоми Осиё, ки дар Ӯзбакистон баргузор шуд, роҳхат гирифтам. Дар ин мусобиқа дар вазни 50кг сазовори ҷойи аввал гардидам. Бори дигар соли 2019 дар чемпионати ҷумҳуриявӣ дар ноҳияи Ванҷ мақоми аввалро касб кардам. Баъди ин ғолибиятҳо маро барои иштирок дар чемпионати Осиё миёни ҷавонон, ки дар шаҳри Тайпеи Чин баргузор шуд, сафарбар карданд. Дар ин мусобиқа ба 4 ҳарифи худ ғалаба кардам, вале дар вохурии финалӣ аз рақиби ҷопониам шикаст хурда мақоми дувумро соҳиб шудам.», — мегӯяд Шодмон Ризоев.
Шодмон Ризоев дар Чемпионати «Осиё-Уқёнусия 2021», ки рӯзҳои 4-5 декабр дар шаҳри Бейрути Лубнон баргузор шуд, иштирок намуд. Ӯ бар 3 ҳарифи худ аз Корея, Қазоқистон ва Ӯзбекистон ғалаба карда, дар финал бо варзишгари тоҷик Муҳаммадҷон Абдуҷаллилов сабқат кард. Ӯ барандаи ҷойи аввали ин мусобиқа гардид.
Дар соли 2022 дар мусобиқаи Grand Prix ва Grand Slan дар Португалия иштирок мекунад.
Довуд Акобиров
