Шӯрои тарбияи ҷисмонӣ ва варзиши кишварҳои Иттиҳоди Давлатҳои Мустақил Беларусро макони баргузории Бозиҳои дуюми кишварҳои ИДМ дар соли 2023 таъин кардааст. Дар ин бора хабаргузории БелТА иттилоъ медиҳад. Макони баргузории Бозиҳои III дар соли 2025 Озарбойҷон хоҳад буд.
Дар ҷаласаи шӯро, ки дар шакли видеоконфронс баргузор шуд, намояндагони Беларус, Озарбойҷон, Арманистон, Қазоқистон, Қирғизистон, Русия, Тоҷикистон, Узбакистон ва Кумитаи иҷроияи ИДМ ширкат намудаанд. Онҳо ҳамкориҳо дар соҳи варзишро баррасӣ намуда, аз ҷумла, гузаронидани чемпионат ва ҷоми ИДМ дар баъзе навъҳои варзишро муҳокима кардаанд. Феълан дар кишварҳои ИДМ таҷрибаи баргузории мусобиқоти варзишӣ таҳти сарпарастии Иттиҳод мавҷуд аст, аммо тартиби ягонаи додани ҳуқуқи баргузории чунин мусобиқаҳо, талабот барои ташкилкунандагон ва шартҳои он вуҷуд надорад.
«Дар ҷаласаи Шӯро ба гурӯҳи корӣ оид ба омодагӣ ва баргузории бозиҳо супориш дода шуд, ки кишварҳои ИДМ то 1-уми июни соли 2022 лоиҳаи низомнома дар бораи чемпионатҳо ва ҷомҳои ИДМ аз рӯи намудҳои варзишро таҳия кунанд.»,-иттилоъ додааст хабари хадамоти матбуоти Шӯрои тарбияи ҷисмонӣ ва варзиши кишварҳои ИДМ.
Аввалин Бозиҳои кишварҳои ИДМ моҳи сентябри имсол дар шаҳри Қазони Тотористони Русия баргузор шуд, Тоҷикистонро 51 варзишгар дар 11 риштаи варзиш намояндагӣ кард. Варзишгарони тоҷик 14 медал – 7 нуқра ва 7 биринҷӣ – гирифтанд. Тоҷикистон дар байни 9 кишвари ширкаткунандаи бозиҳо ҷойи ҳафтумро соҳиб шуд.
