Саъдӣ Тоирзодаро Instagram машҳур намуд. Ӯ яке аз аввалин забономӯзонест, ки дар фазои маҷозӣ ба ҷавонони тоҷик бо равиши соддаву осон забон меомӯзад. Вале то расидан ба ин марҳала зиндагии пуршебу фарозе дошта, машаққати муҳоҷиратро низ чашидааст, дар бозорҳои Душанбе низ савдогарӣ кардааст.
Саъдиро мардум “акаи Саъдӣ” хитоб мекунанд. Ӯ муаллими забони англисӣ буда, бо усули хос саҳифаашро дар Instagram гардонандагӣ мекунад ва беш аз 80 ҳазор обуначӣ дорад. Ӯ калимаву ибора ва ҷумлаҳои маъмул ва серистеъмоли забони англисиро ба таври содда ба обуначиҳояш мефаҳмонад.
Саъдӣ яке аз блогерони шинохтаи тоҷик аст, ки муҳтавои сегменти тоҷикии Instagram-ро мусбат тағйир дод. Агарчи ин муваффақият осон ба даст наомадааст.
Замони мактабӣ мехост рӯзноманигор шавад, вале муваффақ нашуд. Зеро, ба донишгоҳ натавонист роҳ ёбад. Бинобар ин, дар бозори “Деҳқон”-и пойтахт ба фурӯши сабзавот машғул шуд. Соли баъдӣ тариқи бурсия бо ихтисоси муаллим-тарҷумон ба донишгоҳ роҳ ёфт. Пас аз як соли таҳсил ба муҳоҷират рафт. Чор сол дар муҳоҷират монд. Ду соли аввал бо шаҳрвандони Туркия кор кард, дар ин муддат маҷбур шуд, ки забони туркиро низ омӯзад.
“Дар муҳоҷират азобҳои зиёд кашидам, махсусан замоне, ки бо туркҳо кор мекардам. Мо маҷбур будем, ки забони туркиро омӯзем, зеро, корфармо бо забони русӣ суҳбат намекард. Дар се моҳ забони туркиро омӯхтам ва каме корам осон шуд. Бо вуҷуди сардиҳо Русия маҷбур будам, ки дар ин кишвар монам, кор кунам ва қарзҳоямро баргардонам, модарамро табобат кардам ва пасон омадам.”,-ба ёд овард ӯ.
Пас аз чор соли муҳоҷирати меҳнатӣ ба Ватан баргашт. Мехост пас аз аёдати волидайн дубора ба Русия равад, вале модар розӣ набуд ва аз Саъдӣ хоҳиш кард, ки таҳсилашро идома диҳад.
Ҳамин тавр, Саъдӣ таҳсилро давом дода, ҳамзамон ба омӯзиши забони англисӣ ҷиддӣ машғул шуд. Ба дарсҳои иловагӣ мерафт, худомӯзӣ мекард…
Саъдӣ бо усули хос видеоҳои омӯзишиашро дар Instagram нашр мекунад. Бархеҳо мегӯянд, чунин корро дар Тоҷиистон аввалин бор Саъдӣ таҷриба кард:
“Аксарият мегӯянд, ки ман оғоз кардаам, вале ман инро дар номи худам навиштанӣ нестам, зеро, ба ин кор чандин муаллим машғул буданд… Дуруст аст, ки ман вақти зиёдамро дар Instagram сарф мекунам, вале бояд бигӯям, ки дар баробари омӯзонидан ё ба саволҳо ҷавоб додан, худ низ меомӯзам.”,- илова кард ӯ.
Instagram Саъдиро машҳур кард ва мардум ӯро шинохтанд. Аз дохилу хориҷи кишвар пешдиҳоди корӣ мегирад.
Ҳоло Саъдӣ бо Беҳрӯз Ҳафизов курси муаллифии хешро бо номи “English 24” муаррифӣ доранд. дар ин курси “онлайн”-ӣ 24 дарси муҳими забони англисӣ ҷойгир шудаааст. Курс барои чор моҳ пешбинӣ шудааст.
Ҳафизуллоҳ Тоҳирӣ
