Паҳлавони кишвар Темур Раҳимов дар мусобиқаи ситораҳои ҷудои ҷаҳон дар Йерусалими Исроил (Jerusalem Masters 2022) медали нуқра ба даст овард.
Мусобиқаи ситораҳои ҷудои ҷаҳон 20-22 декабр бо иштироки 367 варзишгар (194 мард, 173 зан) аз 58 давлат баргузор шуд. Тибқи низомнома ба мусобиқа варзишгароне, ки дар радабандии ҷаҳонии ҷудо дар вазни худ то ҷои 36-умро ишғол намудаанд, даъват карда шуданд.
Темур дар вазни +100кг, ки дар радабандии ҷаҳонӣ дар ҷои аввал аст, нерӯсанҷиро аз даври дуюм оғоз карда, бар Ричард Сипоз (Маҷористон), дар чорякфинал бар Ушангӣ Кокаурӣ (Озарбойҷон) пирӯз шуда, ба нимфинал баромад. Ҳарифаш дар нимфинал Алишер Юсупови Узбекистонӣ буд, ки ӯро низ шикаст дод. Сипас Темур Раҳимов дар финал аз ҳарифи ҷопониаш Татсуру Саито мағлуб гардида, ҷои дуюмро сазовор шуд. Медалҳои биринҷиро дар ин вазн Алишер Юсупов (Узбекистон) ва Кокоро Кагеура (Ҷопон) ба даст оварданд.
Дар рӯзи охир, ҳамчунин Комроншоҳ Устопириён дар вазни -90кг гуштин гирифта, ҷои ҳафтумро ишғол кард. Ҳарифаш дар даври аввал Лаша Бекаурии гурҷӣ буд, вале бо сабаби вазнаш дуруст наомадан, аз сабқат хориҷ карда шуд. Комроншоҳ сипас дар даври дуюм Эдуард Триппели олмониро мағлуб кард, аммо дар чорякфинал аз Саширо Мураои ҷопонӣ, ки медали тиллои ин вазнро сазовор шуд ва дар қувваозмоии тасаллобахш аз Давлат Бобонови узбекистонӣ мағлуб гардид.
Варзишгари дигарамон Эмомалии Нуралӣ дар вазни -66кг рӯзи якуми мусобиқа дар аввалин нерусанҷӣ аз Реда Седоукии фаронсавӣ шикаст хурд.
Ҳамин тариқ, Темур Раҳимов аввалин варзишгари Тоҷикистон шуд, ки сазовори медали “World Judo Masters» гардид. Ба ӯ дар баробари медали нуқра 4000 евро ҷоизапулӣ тақдим шуд.
