Apple ба барномаи давлатии Чин оид ба ёронаҳои электроника ҳамроҳ шуд
Ширкати Apple ба барномаи давлатии Чин оид ба ёронаҳои электроникаи маишӣ ҳамроҳ гардид, то фурӯшро дар пасманзари рақобати шадид аз ҷониби брендҳои маҳаллӣ ва коҳиши талаботи истеъмолӣ тақвият бахшад. Дар ин бора нашрияи South China Morning Post (SCMP) хабар медиҳад.
Дар доираи ин ташаббус, сокинони Пекин ва Шанхай метавонанд маҳсулоти Apple-ро бо тахфиф то 2000 юан дастрас кунанд. Субсидия ба баъзе моделҳои iPhone, iPad, Apple Watch ва MacBook дахл дорад — танҳо дар ҳолате, ки онҳо аз нуқтаҳои расмии фурӯши ширкат (магазинҳои чакана ва ё мағозаи онлайн) харидорӣ шаванд.
Дар Шанхай ин барнома тавассути ҳашт нуқтаи фурӯши расмӣ дастрас аст, дар ҳоле ки дар Пекин фармоишро танҳо онлайн дода, дар ҳудуди шаҳр дастрас намудан мумкин аст. Барои дастгоҳҳое, ки арзиши то 6000 юан доранд, тахфифи 500 юан дода мешавад. Барои баъзе моделҳои MacBook бошад, имкон аст тахфиф то 2000 юан дода шавад.
То ин вақт, чунин тахфифҳоро асосан фурӯшандагони мустақили интернетӣ пешниҳод мекарданд. Ин бори аввал аст, ки худи Apple бевосита дар чунин барномаи давлатӣ ширкат мекунад.
Тибқи арзёбии таҳлилгарон, интиқоли iPhone ба Чин соли 2025 эҳтимолан то 1,9% коҳиш ёбад. Дар заминаи суст шудани иқтисодиёт ва рақобати афзоянда аз ҷониби ширкатҳое мисли Huawei, иштирок дар чунин барнома ҳамчун як тадбири стратегӣ барои ҳифзи мавқеи Apple арзёбӣ мегардад.
