Рустам Нематов аспбоз буда, ҳоло дар яке аз сиркҳои Ҷумҳурии халқии Хитой фаъолият дорад. Ӯ дар барномаи навбатии “Бол” доир ба кору зиндагиаш қисса намуд.
Қаҳрамони мо пас аз хатми мактаби миёна бо ёрии яке аз аспбозони маъруфи кишвар Фирӯз Убайдов ба Хитой рафт.
«Пас аз хатми мактаб чӣ кор карданамро намедонистам. Рӯзе Фирӯз Убайдов пешниҳод кард, ки ба Хитой оям ва ҳамчун аспбоз дар сирк фаъолият кунам. Ҳамин тавр, аввали соли 2019 ба ин ҷо омада, пас аз як ҳафтаи тамрину омӯзиш ба кори сирк оғоз кардам ва акнун аз се сол мешавад, ки ҳамчун аспбоз кор мекунам. Ин кор душвор аст, аммо дилгиркунанда нест ва бо шӯру шавқ анҷом медиҳам. Дар як шабонарӯз 3-4 соат кор мекунам ва ҳар ҳунарнамоӣ то 10 дақиқа аст.», — гуфт ӯ.
Роҳбарияти сирк ӯ ва ҳамкоронашро ба хӯрок ва ҷойи хоб таъмин намудаанд. Ҳоло моҳонааш бо қурби асъори миллии Тоҷикистон ҳудуди 12 ҳазор сомонӣ аст ва аз ин маблағ ҳиссаеро барои волидонаш ба Тоҷикистон мефиристад.
Рустам мегӯяд, ки дар Хитой мардум ҳунарашро хуб қадр мекунанд, пас аз намоишҳо бо ӯ дар бораи ҳунараш суҳбат мекунанду акс мегиранд.
Ҳафизуллоҳ Тоҳирӣ
