Арманистон 130-юмин кишвар дар ҷаҳон аст, ки ба интернети моҳвораӣ аз Starlink фаъол гардид.
Ҳамзамон, кори ширкат дар Умон ба роҳ монда шуд. Илон Маск ваъда медиҳад, ки дар шаҳрҳои калон ва гӯшаҳои дурдасти ин кишварҳо «интернети босуръат ва устувор»-ро таъмин мекунад.
Starlink — ин низоми ҷаҳонии иртибототи моҳвораӣ мебошад. Он аз ҷониби ширкати SpaceX барои таъмини интернети баландсуръат пешбинӣ шуда, ба соҳибкори амрикоӣ Илон Маск тааллуқ дорад. То моҳи сентябри соли 2024 ин хадамот мувофиқи изҳороти ширкат тақрибан 4 миллион корбар дошт.
Шабакаи Starlink дастрасиро ба интернет аз ҳар нуқтаи ҷаҳон таъмин мекунад. Суръати ҳаракати трафик 1 Гбит/с-ро ташкил медиҳад, ки ба стандарти насли панҷуми иртибототи мобилӣ (5G) мувофиқ аст.
Якчанд ҳазор дастгоҳ дар мадори назди Замин ҷойгир шудаанд, яъне, дар масофаи то 550 км аз сатҳи Замин.
