Масрури 18-сола аллакай дар тарабхонаи “Jonny cake”-и шаҳри Уфа ширинипаз аст…
Масрур Алибахшев аз кӯдакӣ вақти зиёдашро бо модараш дар ошхона мегузаронид ва оҳиста-оҳиста аз наворҳои Youtube ва Instagram ҳунари пӯхтупазро омӯхт.
Ӯ ҳоло низ худомӯзӣ ва дар баъзе корҳояш навоварӣ мекунад то кулчақандҳояш дар шакл ва тамъ тафовут дошта бошанд. Масрур ба зоҳири шириниҳояш бисёр таваҷҷуҳ менамояд ва аксари пайгиронаш дар шабакаҳои иҷтимоӣ бинобар ғайриоддӣ будани маҳсули дасташ ба саҳифаи ӯ обуна шудаанд.
Масрур инчунин блогерӣ мекунад ва дар олами маҷозӣ ин нафаронро фуд-блогер мегӯянд. “Вакте фуд-блогериро оғоз кардам, бисёр буданд нафароне, ки дар шарҳи наворҳо суханони қабеҳ менавиштанд, вале бо гузашти вақт ҳамааш хуб шуд ва ҳоло мардум бо ман ҳамчун мутахассиси кори худ муносибат мекунанд.”
Ширинипази ҷавон фармоишҳояшро тариқи Instagram қабул мекунад ва бо ин роҳ, яъне, кори асосиаш зиндагиро пеш мебарад.
Ҳоло Масрур шогирдони зиёд дорад ва ба онҳо ширинипазиро меомӯзонад. “Дар аввал ба 2 гурӯҳи иборат аз 10 нафар дарс мегузаштам. Намеҳаросидам, баръакс, аз омӯхтани дониши худ ба дигарон лаззат мебурдам. Шогирдонам асосан ҳамкурсону шиносҳоям ҳастанд, ки ҳамагӣ духтаронанд”.
Пухтупазро аксарият кори занона мегӯянд, вале Масрур ба ин андеша розӣ нест ва ба ин бовар аст, ки дилхоҳ нафар метавонад ба ин кор машғул шавад ва корашро хуб иҷро намояд.
Аҳли оила дар аввал ба ширинипаз шудани Масрур зид буданд. Бинобар ин, ӯ ниҳонӣ ба ин кор машғул мешуд, Дар ниҳоят ба ин хулоса расиданд, ки вай кори дӯстдоштаашро анҷом медиҳад, дигар муқобилият накарданд.
Ҳ. Тоҳирӣ
