Карлос Кордейро, мушовири калони президенти Федератсияи байналмилалии футбол (FIFA) Ҷанни Инфантино, ба нишони эътироз нисбат ба нақшаи фурӯши ҳуқуқҳои тиҷоратии Чемпионати ҷаҳон аз мақомаш истеъфо дод.
Ба иттилои Reuters, Кордейро изҳор доштааст, ки дар таҳияи ин пешниҳод иштирок накардааст ва онро комилан ҷонибдорӣ намекунад.
«Ин созиш барои ассотсиатсияҳои аъзои FIFA, барои футбол ва рушди дарозмуддати он зараровар аст. Фурӯхтани ҳиссаи доимӣ аз арзишмандтарин дороии футбол ба хотири ба даст овардани 4,2 миллиард доллар, ояндаи ин бозиро гарав мегузорад», — гуфтааст ӯ.
Пештар FIFA аз таъсиси сохтори нави тиҷоратӣ бо номи FIFA Forward Enterprise (FFE) хабар дода буд. Ин ниҳод фаъолияти тиҷоратии мусобиқаҳои асосии FIFA, аз ҷумла Чемпионати ҷаҳонро идора хоҳад кард. Интизор меравад, ки яке аз сармоягузорони асосии он ширкати Thrive Eternal, вобаста ба Ҷошуа Кушнер — бародари домоди президенти ИМА Доналд Трамп — бошад.
Тибқи нақша, FFE то охири сол 4,2 миллиард доллар сармоя ҷалб мекунад.
Ин пешниҳод аз ҷониби чанд кунгураи бузурги футбол, аз ҷумла UEFA, CONCACAF ва AFC, мавриди интиқод қарор гирифтааст. Ба гуфтаи онҳо, чунин иқдом метавонад ба мустақилияти молиявӣ ва рушди дарозмуддати футболи ҷаҳонӣ таъсири манфӣ расонад.
