Шӯрои Федератсияи байналмилалии хоккей (IIHF) тасмим гирифт, ки дастаҳои мунтахаби Русия ва Беларусро ба Чемпионати ҷаҳон оид ба хоккей дар мавсими 2026–2027 роҳ надиҳад. Дар изҳороти расмии ин ниҳод гуфта мешавад, ки қарор бо сабаби нигарониҳо вобаста ба амният, таъмини тартиботи ҷамъиятӣ ва ҳифзи адолати варзишӣ қабул шудааст.
IIHF дар ҷаласаи худ дархостҳои федератсияҳои хоккейи Русия ва Беларусро барои иҷозаи иштирок дар чемпионатҳои ҷаҳон байни мардон, занон, ҷавонон ва наврасон баррасӣ кард. Пас аз арзёбии ҳар як мусобиқа алоҳида, қарор шуд, ки тими мардонаи Русия дар ҳамаи мусобиқаҳои мавсими 2026–2027 иштирок намекунад. Танҳо масъалаи иштироки тими занонаи Русия моҳи ноябри соли 2026 бо назардошти вазъ ва арзёбии нави хатарҳо бозбинӣ хоҳад шуд.
Дар мавриди Беларус, IIHF тасмим гирифт, ки тими мардона ва тими ҷавонони ин кишвар низ бинобар нигарониҳои амниятӣ ва таъмини тартибот ба мусобиқаҳои қаҳрамонии ҷаҳон роҳ дода нашаванд. Дар бораи иштироки дигар дастаҳои Беларус ҳоло маълумоти иловагӣ нашр нашудааст.
Чемпионати ҷаҳон оид ба хоккей байни мардон аз 14 то 30 майи соли 2027 дар шаҳрҳои Манҳайм ва Дюсселдорфи Олмон баргузор мешавад.
Русия ва Беларус пас аз оғози ҷанги густурдаи Русия алайҳи Украина дар соли 2022 аз аксари мусобиқаҳои байналмилалии хоккей маҳрум шудаанд. Барои Русия ин шашумин Чемпионати ҷаҳон хоҳад буд, ки пай дар пай онро аз даст медиҳад.
