Наворе паҳн шудааст, ки ба назар мерасад мушаки амрикоӣ пойгоҳи баҳрии Сипоҳи посдорони инқилоби исломиро ҳадаф қарор медиҳад. Ин пойгоҳ дар наздикии мактабест, ки даҳҳо духтар кушта шудаанд.
Видеои нав, ки аз ҷониби хабаргузории нимарасмии Mehr News Agency нашр шудааст, аввалин наворест, ки нишон медиҳад, мушакҳо 28 феврал ба минтақаи Миноб дар ҷануби Эрон зарба мезананд.
Ин навор аз як сохтмони наздик сабт шудааст ва нишон медиҳад, ки мушак ба ҳадафе дар дохили пойгоҳи Сипоҳи посдорони инқилоби исломи бархӯрдааст. Коршиносон мегӯянд, ки он ба мушаки амрикоии BGM-109 Tomahawk ё UGM-109 Tomahawk (мушки зарбазани заминии Tomahawk) монанд аст.
Ҳангоме ки дурбин ба тарафи рост гардонда мешавад, дуд аз самти мактаби Shajareh Tayyiba School баланд мешавад. Ба гуфтаи расонаҳои давлатии Эрон, дар ин ҷо ҳадди ақал 168 кӯдак ва 14 омӯзгор кушта шудаанд.
Ба иттилои CNN, ин далелҳо ба маълумоте илова мешаванд, ки ба назар мерасад иддаои президенти ИМА Доналд Трампро рад мекунанд. Трамп гуфта буд, ки ҳамла аз ҷониби Эрон анҷом шудааст. Аммо таҳқиқоти CNN, таҳлилҳои коршиносон ва гузоришҳои дигар расонаҳо нишон медиҳанд, ки эҳтимол ҳамларо нерӯҳои низомии ИМА анҷом додаанд.
«Аз рӯи он чизе ки ман дидам, ин кори Эрон буд.», — гуфт Трамп рӯзи шанбе ба рӯзноманигорон ва илова кард, ки таҷҳизоти ҷангии Эрон «дақиқ нестанд».
Маъмурияти Трамп бошад, дар бораи ин ҳамла бо эҳтиёт сухан мегӯяд. Вақте аз вазири дифои ИМА Пит Хегсет пурсиданд, ки оё гуфтаҳои Трамп дурустанд, ӯ гуфт: «Мо албатта ин масъаларо таҳқиқ мекунем, вале ягона тарафе, ки ғайринизомиёнро ҳадаф қарор медиҳад, Эрон аст». Пеш аз изҳороти Трамп, Кохи Сафед низ эҳтимоли анҷом додани ин ҳамларо аз ҷониби низомиёни ИМА пурра рад накарда буд.
Сам Лэйр, муҳаққиқи Маркази таҳқиқоти паҳн нашудани силоҳҳои ҳастаии James Martin Center for Nonproliferation Studies ба CNN гуфтааст, ки лавозимоти ҷангии дидашаванда дар видео ба мушаки Tomahawk-и ИМА мувофиқат мекунад.
Ба гуфтаи ӯ, шакли салибмонанди мушак, болҳои марказӣ ва қисми ақиби он ба мушакҳои TLAM хос аст.
Таҳлили қаблии CNN аз рӯи тасвирҳои моҳвораӣ, наворҳои геолокатсияшуда ва изҳороти мақомдорони ИМА нишон дода буд, ки эҳтимол ҳамларо Иёлоти Муттаҳида анҷом додааст.
ПИСАНД ОМАД? БО ДӮСТОНИ ХУД МУБОДИЛА КУНЕД!
+1
+1
+1
+1
+1
+1
+1
