Иёлоти Муттаҳидаи Амрико ва Чин дар мавриди шароити созиш оид ба TikTok ба мувофиқа расиданд.
Тибқи иттилои Вазорати тиҷорати Чин, дар пайи гуфтушунидҳои 14–15 сентябр дар Мадрид намояндагони ду кишвар дар бораи зери назорати ҷониби амрикоӣ гузаштани шабакаи иҷтимоии TikTok ба созиш расиданд.
Аз ҷониби Чин гуфтушунидро муовини сарвазири Шӯрои давлатии Чин Хэ Лифэн ва аз ҷониби ИМА вазири молияи ин кишвар Скотт Бессент ва намояндаи тиҷоратӣ Ҷеймесон Грир роҳбарӣ карданд.
Дар изҳорот омадааст, масъаллаи TikTok бояд «бо роҳи ҳамкорӣ, коҳиши монеаҳои сармоягузорӣ ва мусоидат ба ҳамкориҳои мувофиқи тиҷоратию иқтисодӣ» ҳал карда шаванд.
Соли 2024 президенти собиқи ИМА Ҷо Байден қонунеро имзо карда буд, ки ширкати чинӣ ByteDance-ро водор месохт TikTok-ро бифурӯшад. Дар акси ҳол, фаъолияти ин шабака дар ҳудуди Амрико қатъ мегардид. Пас аз савгандёдкунии Доналд Трамп иҷрои қарор муваққатан ба таъхир гузошта шуд.
