Се саду ҳаштоду чор санъаткор дар Тоҷикистон барои фаъолияти сарояндагӣ ҳуҷҷатҳои соҳибкорӣ доштаанд. Дар нимсолаи якуми соли 2025 барои фаъолияти сарояндагӣ онҳо беш аз 429 ҳазор сомонӣ андоз пардохт кардаанд. Ҳамчунин ба ҳолати 1 июли соли 2025 дар кишвар 112 ҳунарманд аз ҳисоби сари вақт пардохт накардани маблағи андоз ба маблағи 720 ҳазор сомонӣ дар назди буҷети давлатӣ қарздор мондаанд.
Нашрияи соҳавии кумитаи андоз — «Боҷу хироҷ» дар як матлабе бо номи «Бақайдгирӣ ва андозбандии санъаткорон» менависад, ки аз ҷониби мақомоти андоз дар 6 моҳи соли 2025 дар фаъолияти ҳунармандон, хусусан, сарояндагон аз ҳисоби пурра нишон надодани даромад ва кормандони кироя (мутрибон ё навозандагон) ба маблағи 65,4 ҳазор сомонӣ андозҳои барилова ҳисоб ва ба буҷет пардохт карда шуданд.
Теъдоди ҳунармандоне, ки ба фаъолияти сарояндагӣ, барандагӣ (ровӣ дар тӯю маракаҳо), навозандагӣ, раққосӣ дар ҷашну маракаҳо, истифодаи нақлиёти махсуси автомобилӣ дар базмҳои арӯсӣ ва дигар ороишот, инчунин фаъолияти суратгирӣ, банаворгирии ҷашну маракаҳо машғуланд, дар шаҳри Душанбе ба 115 нафар, вилояти Хатлон 171 нафар, вилояти Суғд 613, Вилояти Мухтори Куҳистони Бадахшон 62 нафар ва дар шаҳру ноҳияҳои тобеи марказ, дар маҷмӯъ, ба 104 нафар баробар будааст.
