Владимир Путин рӯзи чоршанбе изҳор дошт, ки барои вохӯрӣ бо Владимир Зеленский, ки онро Доналд Трамп пешниҳод карда буд, омодааст, вале ин музокирот бояд танҳо дар Маскав баргузор шавад.
Раисиҷумҳури Русия дар нишасти матбуотӣ пас аз паради Ғалаба дар Пекин хабар дод, ки президенти ИМА Доналд Трамп аз ӯ хоҳиш кардааст бо Зеленский паси мизи музокирот нишинад ва масъалаи хотима додани ҷанги Русия дар Украина баррасӣ шавад.
«Ман гуфтам, ки ҳа, ин мумкин аст, бигзор ба Маскав биёяд.», — гуфт Путин.
Кремл борҳо таъкид кардааст, ки муҳлати ваколатҳои президентии Зеленский ба анҷом расидааст, ҳарчанд қонунҳои Украина дар шароити ҷангӣ ва ишғоли қисме аз қаламрави кишвар баргузории интихоботро манъ мекунанд.
Киев ба пешниҳоди Путин ҷавоби рад додааст. Вазири корҳои хориҷии Украина пешниҳодро «ғайриқобили қабул» мехонад.
Муовини аввали роҳбари дастгоҳи президентии Украина Андрей Сибига менависад:
«Ҳадди ақал ҳафт кишвар омодагии худро барои мизбонии мулоқоти роҳбарони Украина ва Русия ба хотири хотимаи ҷанг изҳор кардаанд: Австрия, Ватикан, Швейтсария, Туркия ва се кишвари Халиҷи Форс. Ин пешниҳодҳои ҷиддӣ мебошанд ва президент Зеленский омода аст ҳамеша вохӯрӣ баргузор шавад. Аммо Путин бо пешниҳоди шартҳои қасдан ғайриқобили қабул сардаргумӣ меорад».
Изҳороти нави Путин пас аз як қатор мулоқотҳое садо дод, ки бо ташаббуси Трамп дар моҳи август баргузор шуда буданд, аз ҷумла музокирот дар Аляска, ки ба зудӣ пас аз он бо Зеленский ва роҳбарони кишварҳои аврупоӣ ва НАТО дар Вашингтон идома ёфтанд.
Музокироти Аляска натиҷаи равшане ба бор наовард. Худи Трамп гуфт: «Мақсадҳо ҳанӯз ба даст наомадаанд, вале имкониятҳои хуб вуҷуд доранд».
Акнун президенти ИМА бар зарурати пешрафт дар раванди ҳалли низои Русия ва Украина таъкид карда, ваъда дод, ки Украина дар чорчӯби созишномаи сулҳ кафолатҳои ҷиддии амниятӣ хоҳад гирифт, зеро ба гуфтаи ӯ, Аврупо «хати аввали дифоъ» хоҳад буд.
