“Ливерпул” рекорди интиқоли англисиро шикаст, зеро, бозигари тими миллии Шветсия Александр Исакро бо маблағи 125 миллион фунт стерлинг (тақрибан 145 миллион евро) ба ҳайати худ ҷалб кард.
Футболбози шведӣ шартномаи 6-сола имзо намуда хароҷоти тобистонаи “Ливерпул”-ро ба беш аз 480,6 миллион евро расонд.
«Фикр мекунам корҳое ҳастанд, ки бояд анҷом диҳам. Ман ҳамлагар ҳастам, вале ҳамеша мехоҳам ба даста ҳарчи бештар фоида расонам, асосан бо голҳо, вале ҳамчунин бо корҳои дигар», — гуфт Исак, ки ҳамчун бозигари 9 дар “Ливерпул” бозӣ хоҳад намуд.
Қабл аз гузаштан ба “Ливерпул” Александр Исак дар “Нюкасл” бозӣ мекард. Вай бозии худро дар клуби “AIK”-и Шветсия оғоз намуда, соли 2017 ба “Боруссия Дортмунд” пайваст.
Ду сол баъд вай ба “Реал Соседад”-и Испания гузашт ва ба даста кумак кард, ки Ҷоми Подшоҳиро (мавсими 2019–20) ба даст оварад.
Ин қарордод ба достони тӯлонии интиқолӣ, ки ҳафтаҳо музокироти пасипардагиро дар бар мегирифт, анҷом бахшид.
Маблағи эълоншуда рекорди пешинаи интиқоли Англияро (124 миллион евро), ки “Челси” барои Энсо Фернандес дар соли 2023 пардохта буд, шикаст.
