Имрӯз, 23 октябр Форуми V-и олимони кишварҳои узви ИДМ ба кори худ шурӯъ кард. Дар ҳамоиш роҳбарон ва олимони варзидаи академияҳои илмҳо ва марказҳои бузурги илмию тадқиқотии ИДМ ширкат доранд.
Қобилҷон Хушвахтзода, Президенти Академияи илмҳои Тоҷикистон зимни сухани ифтитоҳӣ гуфтааст, баргузории чунин чорабиниҳо ба ҳамкориҳои байналмилалӣ таъсири судманд дошта, барои табодули таҷриба байни олимон ангезаи хубе хоҳад буд. Иштирокчиёни форум тамоюлҳои асосии илмҳои фундаменталӣ, ҳолат ва дурнамои онҳоро муҳокима карда, дар бораи мушкилоти аслии илму техникии муосир баҳс хоҳанд кард.
Форуми V-и олимони аъзои давлатҳои ИДМ дар Тоҷикистон рӯзҳои 23-24 октябри соли 2024 баргузор мегардад. Дар ҳошияи ин чорабинӣ ҳамзамон баргузории ҷаласаи XII Шурои ҳамкорӣ дар соҳаи илмҳои бунёдии давлатҳои аъзои ИДМ ва ҷаласаи якуми Шурои олимони ҷавони назди Шурои ҳамкорӣ дар соҳаи илмҳои бунёдии давлатҳои аъзои ИДМ нақшбандӣ шудааст. Ташкилкунандагони чорабинӣ Академияи миллии илмҳои Тоҷикистон Шурои олимони ҷавони АМИТ, Кумитаи иҷроияи давлатҳои аъзои ИДМ, Фонди байнидавлатии ҳамкориҳоии бунёдии ИДМ ва вазорату идораҳои дахлдор мебошанд.
Дар чорабинӣ иштироки зиёда 70 нафар олимону муҳақикони варзида, роҳбарияти муассисаҳои илмии кишварҳои ИДМ дар назар аст.
