Як гурӯҳ рӯзноманигорон ва блогерони ҷавон аз вилоятҳои Хатлону Суғд, ВМКБ ва шаҳру навоҳии тобеъи марказ бо роҳбарон ва муассисони расонаҳои мустақили марказии Тоҷикистон дар ҳамоише таҳти унвони “Зарурат ва имконияти ҳамкориҳо” бо ҳам вохӯрданд. Дар ин ҳамоиш, ки бо ибтикори ташкилоти ҷамъиятии “Насли нави Тоҷикистон” ва бо дастгирии Сафорати ИМА дар Тоҷикистон баргузор шуд, роҳбарон ва масъулони гурӯҳи расонаҳои “Азияплюс”, гурӯҳи расонаҳои Маркази тадқиқоти журналистии Тоҷикистон “Фараж” ва “Самак”, гурӯҳи расонаҳои “Pressa.tj”, Tojikiston, ИмрӯзNews, Vatan, Jom.tj ва дигарон иштирок намуданд.
Дар ҳамоиш масъалаи ҳамкории рӯзноманигорон ва блогерони ҷавони минтақаҳои дурдасти Тоҷикистон бо расонаҳои мустақили марказии Тоҷикистон мавриди баррасӣ қарор гирифт. Дар ҳамоиш қайд шуд, ки ин ҳамкорӣ метавонад, мушкилоти дастрасии иттилоот дар минтақаҳои Тоҷикистонро сабуктар кунад. Дар ҳоли ҳозир, аксари расонаҳои мустақили Тоҷикистон бо сабабҳои молиявӣ наметавонанд, дар минтақаҳои Тоҷикистон хабарнигорони маҳалии худро дошта бошанд. Ба далели надоштани хабарнигорон дар минтақаҳо расонаҳо наметавонанд, навигариҳои минтақаҳоро ба таври дуруст ва саривақтӣ инъикос кунанд. Бинобар ин ҳамкории онҳо бо блогерон ва рӯзноманигорони ҷавони минтақаҳо метавонад, барои ҳалли мушкилоти норасооии иттилоот мусоидат намояд. Дар ҳамин ҳол, ин ҳамкорӣ барои блогерон ва рӯзноманигорони маҳаллӣ низ боманфиат аст. Онҳо бо ин роҳ имкон пайдо мекунанд, контентҳои худро дар расонаҳои мустақили марказии Тоҷикистон ба нашр расонанд. Ин ба онҳо имкони дарёфти маблағ, таблиғи блоги худ ва ҷалби муштариёни бештар ва беҳтар шудани сифати контентҳояшон мусоидат мекунад.
Як гурӯҳи муассисон ва масъулони расонаҳои марказии Тоҷикистон, ки имкониятҳои ҳамкории худро бо блогерон ва рӯзноманигорони минтақавӣ муаррифӣ намуданд, изҳори омодагии худро барои ҳамкорӣ бо блогерон ва рӯзноманигорони ҷавони минтақаҳои Тоҷикистон баён намуданд.
Дар ҳамоиш, изҳори умед карда шуд, ки истифода бурдани имкониятҳои расонаҳои мустақили марказӣ ҳам барои расонаҳо ва ҳам барои блогерон муфид аст. Он барои афзоиши муштариёни ҳам расонаҳои мустақил ва ҳам блогерон дар шабакаҳои иҷтимоӣ кумак мекунад. Зеро самаранок истифода бурдани шабакаҳои иҷтимоӣ ба рушди расонаҳо, шахсият, дастрас намудани иттилооти дуруст, дарёфти даромади молӣ барои пешбурди зиндагӣ, кӯмак ба ҳалли мушкилоти иҷтимоӣ ва баланд бардоштани сатҳи фарҳангу донишҳои муштариён ва афзоиши имиҷи кишвар дар арсаи байналмилалӣ мусоидат мекунад.
