Парвариши қулфинай дар зимистон барои кишвари мо маъмул нест. Заробиддин Абдусаломзодаи 31-сола яке аз нафаронест, ки дар шароити гармхона ба парвариши қулфинай машғул аст ва маҳз дар зимистон ҳосил пухта мерасад.
Ӯ корро дар 0,30 га замин оғоз кард. Ҳоло 15 гармхона дорад, ки ҳар кадоме 60 метр тӯл доранд ва 1 га заминро ташкил медиҳад.
Ин ҷавон беш аз як моҳ аст, ки ҳосили қулфинайро аз гармхонаҳои худ ҷамъоварӣ карда ба бозор арза мекунад.
Ба гуфтаи ӯ, дар фасли зимистон дидани чунин ҳосили пурбор ё буттаҳои сабзу ғарқи гул танҳо аз пластикпӯш гаштани порчае аз замин вобаста нест.
Барои гирифтани ҳосили пурбору шаҳдбор, қабл аз ҳама, доштани таҷриба, меҳнати ҳалолу интихоби дурусти тухмӣ ё навъи маҳсулот муҳим арзёбӣ мешавад.
Заробиддин Абдусаломзода мисли ҳазорҳо ҷавонони дигари кишвар қаблан ба муҳоҷирати меҳнатӣ мерафт. Чаҳор сол мешавад, ки ба парвариши қулфинай машғул аст ва даромади хубе низ ба даст меорад.
Ин ҷавон ният дорад, ки бо зиёд кардани майдони гармхонаҳои худ оянда содироти қулфинайро ба хориҷ роҳандозӣ намояд.
Ӯ мегӯяд, бо меҳнати ҳалолу интихоби навъҳои бозоргири қулфинай имкон фароҳам мешавад то дар ин соҳа муваффақ шавӣ. Зеро, нисбат ба баҳор дар зимистон харидори ин навъи маҳсулот зиёд аст.
«Ҳоло харидорон аз шаҳри Душанбе омада, 1 кг қулфинайро аз мо 50 сомонӣ харидорӣ мекунанд ва зарурат пеш намояд, ки мо бозор равем. «,- гуфт Заробиддин.
