Умар Шеров солҳои 2015-2022 яке аз донишгоҳҳои тиббии Русияро хатм кард, аз замони донишҷӯӣ ба кори амалӣ машғул буд ва дандонпизишк аст. Умар раиси тоҷикони шаҳри Новосибирски Русия буда, барои муаррифии таъриху фарҳанги миллати тоҷик талош меварзад. Мо бо ӯ дар барои таҳсил, кор, ва равишҳое, ки барои муаррифии кишварамон истифода мекунад, пурсон шудем.
Ӯ замони таҳсил бо сарфи вақти кам фанҳои лозимро аз худ мекард ва бо баҳои хубу аъло донишгоҳро хатм кардааст.
«Соли сеюми таҳсил дар дармонгоҳи «Пломба» таҷрибаомӯзӣ мекардам ва пас аз хатм корро расман оғоз намудам.»,-нақл кард Умар.
Умар дар дармонгоҳи хусусӣ фаъолият дорад. Муносибати беморон дар сатҳи болост. Аз донишу малакааш тавсиф ҳамеша кардаанд.
Қаҳрамони барномаи мо ҳамчунин роҳбари созмони ҷавонони тоҷик дар вилояти Новосибирск раиси тоҷикони шаҳри Новосибирски Русия аст.
«Дар ин ҷо чорабаниҳои гуногун ташкил мегардад ва намояндагони кишварҳо имкон доранд таъриху фарҳанги худро муаррифӣ намоянд. Мо бо дигар ҳамватанон дар баробари дигар миллатҳо кӯшиш мекунем, ки бо истифода аз фурсат дар бораи Ватан бигӯем, онро шиносонем.»,- илова кард ӯ.
Умар ният дорад то ду соли дигар дар Русия монад ва сипас ба Тоҷикистон баргашта дармонгоҳи хешро таъсис дода, дар хизмати мардум бошад.
Ҳафизуллоҳ Тоҳирӣ
