20 барномаи сохтаи Рустамҷон Қурбонов дар “Play market” дастрас аст. Ӯ барномасозиро 7 сол қабл, аз 18-солагӣ оғоз кардааст. Рустамҷон Қурбонови 25-сола риштаи информатикаи Донишгоҳи миллии Тоҷикистонро хатм карда, ҳоло дар яке аз ширкатҳои мобилӣ фаъолият дорад. Ӯ дар овони кӯдакӣ орзуи табиб шуданро доштааст, аммо баъдтар ба хулосае меояд, ки пешаи дигаре бояд дошта бошад.
“Ба он хотир табиб шудан мехостам то ба мардум ройгон хизмат намоям. Вақте бузург шудам, дарк кардам, ки табобати комили ройгон гоҳо ғайримкон аст. Зеро, барои сиҳатии ҳар бемор дорую даво лозим аст, ки онро табиб ройгон ба даст оварда наметавонад. Аз ин рӯ, тасмим гирифтам, касбу кори муосире бояд бигирам то аз ин тариқ ба мардум хизмат кунам. То ҳол орзуи табобати ройгони беморонро дар қалб мепарварам. Нақша дорам, ки дар оянда як “фонди хайриявӣ” таъсис дода аз ин тариқ беморонро бо истифода аз мутахасисони варзида ба табобат фаро гирам.”-мегӯяд Рустамҷон Қурбонов.
Аксарият дар Тоҷикистон телефонҳои ҳушманди бо низоми «Android» доранд. Бинобар ин, Рустамҷон ҳамаи барномаҳои хешро барои системаи Android сохтааст. Бештари барномаҳои ӯ барои омӯзиши осони забонҳои хориҷӣ пешбинӣ гардидаанд.
“Учит английский язык с нуля без интернета”, “Худомӯзии забони англиси”, “Конститутсияи Ҷумҳурии Тоҷикистон” ва “Medinfo-мавзӯҳои тиббӣ”-барномаҳои сохтаи Рустамҷон Қурбонов аст, ки ҳазорҳо истифодабаранда дорад.
Рустамҷон Қурбонов бештар барномаҳои омӯзишӣ месозад. “Ман метавонистам, бештар “бозӣ” созам, вале аз он ҷавонону наврасон ҳеҷ суде намегиранд. Баръакс, боиси талафи вақт, коста гардидани саводу маърифаташон мегардад. Бинобар ин, барномаҳои омӯзишӣ таҳия мекунам то кори довталабонро осон кунам.”,- таъид мекунад Рустамҷон Қурбонов.
Баҳруллои М.
