Собир Сатторов дар шаҳри Норак зиндагӣ мекунад. Ӯ аз соли 2019 ба киштисозӣ пардохт ва то кунун ду киштӣ ва як гидроскутер сохтааст. Киштиҳои сохтаи ӯ аз киштиҳои дар хориҷ сохташуда тафовуте надоранд, вале арзишаш ду баробар камтар аст. Собир як киштиро давоми 2-3 моҳ месозад ва аз маводе истифода мекунад, ки дар Ватан истеҳсол шудааст.
«Муҳаррик истеҳсоли хориҷист. Барои киштисозӣ ширеши махсусе лозим аст, ки онро аз Чин ба Тоҷикистон ворид мекунанд. Дигар маҳсулоти истеҳсоли худамонро истифода мекунем.»,-иттилоъ дод Собир.
Ин ҷавон соли 2012 Донишгоҳи миллии Тоҷикистонро бо ихтисоси иқтисодчӣ хатм кардааст. Феълан роҳбарии ширкати “Чакан-таксӣ”-ро дар шаҳри Норак ба уҳда дорад.
Собир барои сохтани як киштӣ тахминан 40 ҳазор сомонӣ масраф кардааст. Ду киштӣ ва як гидроскутерро аз ҳисоби пасандозе, ки солҳо ҷамъоварӣ карда буд, омода кард. Чанде қабл ширкати хориҷие як киштиашро барои санҷиши сатҳи оби обанборҳои нерӯгоҳҳои Нораку Бойғозӣ харидорӣ кард.
Собир мегӯяд, талабот ба истифодаи киштӣ дар шаҳри Норак хеле зиёд аст. Меҳмонону сайёҳоне, ки ба ин шаҳр барои истироҳат меоянд, аз киштии ӯ истифода мебаранд.
«Дар Тоҷикистон обанбору мавзеъҳои сайёҳии обӣ хеле зиёд аст, ки аз киштӣ истифода мешавад истифода бурд. Агар сарпарасте пайдо шавад, мо метавонем, киштиҳои гуногунро барои ин мавзеъҳои сайёҳӣ созем.«,-таъкид намуд Собир.
Корнамоии Собир Сатторов боиси тавсиф аст ва дар вилояти Хатлон собиқа надорад. Агар ин кори ӯ аз ҷониби мақомоти маҳаллӣ пуштибонӣ ёбад, умед аст, ки дар ояндаи на чандон дур киштиҳои сохтаи Собир Сатторов бо тамғаи “Made in Tajikistan” дастаси сайёҳони об гардад.
