Муҳайё Муллоҷонова як ҳамватани мост, ки ҳоло дар шаҳри Мюнхени Олмон қарор дорад. Ӯ дар барномаи “Бол” доир ба таҳсил, касбомӯзӣ ва зиндагӣ дар ин кишвар қисса кард.
“Пас аз хатми мактаби миёна барои дар хориҷи кишвар таҳсил кардан хеле роҳ ҷустам ва билохира барномаи “Au Pаir”-ро пайдо кардам. Тавассути барномаи мазкур ба Олмон омадам ва инак наздики ду сол мешавад, ки инҷоям.”— мегӯяд Муҳайё.
“Au Pаir”-барномаест, ки ба хориҷиён имкон медиҳад тӯли як сол дар оилаи олмонӣ зиндагӣ намуда, забони олмониро омӯзанд. Аммо Муҳайё дар хонаи оилаи олмонӣ ҳамагӣ 7 моҳ зиндагӣ кард. Ӯ имкон пайдо кард, ки тариқи барномаи “Ausbildung” ҳам касб омӯзад ва инчуни дар меҳмонхонае таҷриба андӯзад.
“Сабаби аз оилаи олмонӣ рафтанам ин буд, ки забонро омӯхта натавонистам, зеро, зан олмонӣ буду шаҳвраш рус ва фарзандонашон забони русиро медонистанду ман бо онҳо бисёр вақт бо забони русӣ суҳбат мекардам.
Чун мақсадам забономӯзиву идома додани таҳсил буд, тасмим гирифтам, ки ба касбомӯзӣ равам ва имкониятҳоямро зиёд гардонам.”, — илова кард ӯ.
Ба нақли Муҳайё, душвориҳои кору таҳсил дар Олмон кам нестанд. Даву тозу зиёд ва танзими ҳуҷҷатҳо, риояи қавонини он кишвар ва ғайра.
Ӯ ҳоло дар курси дуюм таҳсил мекунад ва ният дорад, ки пас аз хатм дар меҳмонхонае, ки коромӯз аст, фаъолияташро идома диҳад. Ҳоло ҳудуди 800 евро маош мегирад ва ҳиссаеро ба волидонаш низ мефиристад.
Ҳафизуллоҳ Тоҳирӣ
