Тағаймурод Шоинов меҳмони навбатии барномаи “Бол” аст. Ӯ бо раводиди корӣ барои кор дар бахши кишоварзӣ ба Бринтанияи Кабир рафт, вале он ҷо камтар аз ду моҳ кор карду халос. Ҳоло дар яке аз меҳмонхонаҳои шаҳри Лондон фаъолият мекунад.
“Ростӣ, тарки кори кишоварзӣ (берун шудан аз ферма) душвор нест, вале шояд баъд аз шаш моҳ ба Лондон рафта натавонем. Кори фермаро нафароне тарк мекунанд, ки забони англисӣ медонанд ва имконоти зиёдтар пайдо кардан мехоҳанд.”,-нақл кард Тағоймурод.
Ӯ мегӯяд, агарчи кори кишвоварзӣ душвор нест, вале ба хотири кам будани соати корӣ пайи имконоти бештар шуд. Зеро, пардохти маблағ соатбайъ аст.
Дар асоси раводид 2 моҳи дигар ҳақ дорад, ки дар қаламрави Британияи Кабир бошад.
“То охири ноябр ҳақ дорам дар ин кишвар бошам. Дар сурати мусоидати маъмурияти меҳмонхона имкони тамдиди раводид вуҷуд дорад. Хушбахтона, гуфтанд, ки барои ин кор мусоидат мекунанд.”, — афзӯд Шоинов.
Қаҳрамони мо хатмкардаи Донишгоҳи давлатии Кӯлоб ба номи Абӯабдуллоҳ Рӯдакӣ буда, 2 сол таҷрибаи омӯзгорӣ дорад. Ӯ замони донишҷӯӣ дар ноҳияи Восеъ ва шаҳри Душанбе аз фанни забони англисӣ ба хонандагони мактаб дарс гуфтааст.
Ҳоло дар “Instagram” ду саҳифа дорад, ки аввалӣ ҳудуди 50 ҳазор ва дуввумӣ наздики 10 ҳазор обуначӣ дорад. Дар саҳифаи аввал доир ба кору зиндагӣ дар Лондон маълумот медиҳаду дар саҳифаи дуввум ба мардум забони англисӣ меомӯзад.
“Тариқи интернет имкони забони англисиро аз худ кардан вуҷуд дорад. Бинобар ин, саҳифаи хешро дар “Instagram” боз кардам. Дар мавриди ёрӣ ба ҳамватанон барои пайдо кардани кор дар Лондон ҳар маълумоте дорам, пешниҳод мекунам. Ин корҳоест, ки барои мардумам анҷом дода метавонам.”, — мегӯяд Тағоймурод.
Ҳафизуллоҳ Тоҳирӣ
